لە مەرزی کێلێ 17 سانتیمەتر بەفر باریووە

ئاڤا نیوز

 

شەپۆلێکی بەفر و بارانبارین هەرێمی کوردستانی گرتووەتەوە و لە هەندێ ناوچەش 17سانتیمەتر بەفر باریووە.

 

وێنە گەورەکە: لە دوێنێ سێشەممەوە، شەپۆلێکی بەفر و بارانبارین هەرێمی کوردستانی گرتووەتەوە، لە زۆربەی ناوچەکان لە شەوی ڕابردووەوە نمەباران دەبارێت، لە بەشێکی ناوچە شاخاوییەکان بەفر باریووە.

 

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا گوتی: ئەم شەپۆلی بەفر و بارانبارینە بەهۆی کاریگەریی شەپۆلێکی دەریای سپی ناوەڕاستە کە گەیشتووەتە عێراق و هەرێمی کوردستان؛ کاریگەری شەپۆلەکە ئەمڕۆش بەردەوام دەبێت."

 

زانیاری پەیامنێران: هاوار عەباس، پەیامنێری ئاڤا لە سۆران، گوتی: لە هەندێ لە ناوچە شاخاوییەکانی سۆران نزیکەی 10 سانتیمەتر بەفر باریووە بەتایبەت لە چیای کۆڕەک و پرژێ.

ژیوار عەبدولڕەحمان، پەیامنێری ئاڤا لە سلێمانی، گوتی، لە گۆیژە و ئەزمەڕ و چەند ناوچەیەکی شاخاوی سنووری پارێزگای سلێمانی بەفر باریووە.

 

زانیاری زیاتر: شەوی ڕابردوو، لە بەشێکی ناوچە شاخاوییەکان بە تایبەت لە ناوچە شاخاوییە سنوورییەکان بەفر باریوە، بەڕێوەبەرایەتی گشتیی کەشناسی و بومەلەرزەزانی هەرێمی کوردستان بڵاوی کردووەتەوە، لە مەرزی کێلێ لە سنووری قەڵادزێ 17 سانتیمەتر بەفر باریووە.

 

ئەوەی پێشبینی دەکرێت: پێشبینی دەکرێت، لە ڕێکەوتی 27 و 28ی ئەم مانگەدا، شەپۆلی پێنجەمی بەفر و بارانبارین دەست پێ دەکات و تاوەکوو 2ی مانگی داهاتوو بەردەوام دەبێت، بەهۆیەوە  پلەکانی گەرما دادەبەزن و خێرایی با زیاد دەکات، پێشبینیش دەکرێت بەفر سەنتەری شارەکانی هەولێر، سلێمانی و دهۆکیش بگرێتەوە.