ئاڤای خەڵک؛ گەڕەکی ئیمام حەمەی تازە لە کفری کێشەی خزمەتگوزاریی هەیە

ئاڤا نیوز

دانیشتووانی گەڕەکێکی کفری بەهۆی قیرتاو نەکردنی ڕێگاکانیان نیگەرانن، دەڵێن، ڕۆژانە کە منداڵەکانمان لە مەکتەب دەگەڕێنەوە تا ئەژنۆیان قوڕە. سەرۆکی شارەوانی بەڵێنی چارەسەریان بۆ دەدات.

کێشەی سەرەکی: گەڕەکی ئیمام حەمەی تازە یەکێکە لە گەڕەکە گەورەکانی کفری و نزیکەی 400 ماڵن، لە ڕابردوودا پڕۆژەی چاککردنی ڕێگای بۆ دەرچووە، بەڵام کە گەیشتووەتە قیرتاوکردن بەجێهێڵراوە، تاوەکو ئێستا کۆڵانەکانی بە هاوین تەپوتۆز و بە زستان قوڕ و چڵپاون.

لێدوانی فەرمی: عەلی خورشید، سەرۆکی شارەوانی کفری بە ئاڤای وت: بەهۆی نەبوونی پارە و قەیرانی دارایییەوە نەمانتوانیوە پارە بۆ کۆمپانیای جێبەجێکار سەرف بکەین بۆیە کارەکانی ڕاگرتووە.

چارەسەر: سەرۆکی شارەوانی کفری لەڕێگەی ئاڤاوە بەڵێنی دا، خۆی لەگەڵ خاوەنی کۆمپانیاکە قسە بکات، بۆ ئەوەی لەسەر ئەرکی خۆی دەست بە کارکردن بکاتەوە و پڕۆژەکە تەواو بکات، تا ئەو کاتەی پارە دەبێت ئینجا بۆی خەرج بکەن.