ئاڤای خەڵک؛ دابەشکردنی زەوی بەسەر فەرمانبەرانی پیرزینی هەولێر کێشەی تێکەوتووە

ئاڤا نیوز

فەرمانبەرانی کۆمەڵگەی پیرزینی هەولێر چەند مانگێکە ناویان بۆ وەرگرتنی زەوی گەڕاوەتەوە، بەڵام لە هیچ شوێنێک زەوی نییە پێیان بدرێت.

کێشەی سەرەکی: فەرمانبەرانی کۆمەڵگەی پیرزین کە ژمارەیان 400 فەرمانبەری مەدەنی و سەربازین، پەیوەندییان بە ئاڤاوە کردووە، داوا دەکەن هاوشێوەی فەرمانبەرانی ناو هەولێر لە ڕێگای دهۆک زەوییان پێ بدرێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤای وت: لەناو پیرزین و چواردەوری هیچ زەوییەکی بەتاڵ نەماوە، ویستمان لە بەحرکە زەوییان پێبدەین، بەڵام ئێستا لەوێش کێشەمان هەیە و 870 پارچە زەویمان کەمە بۆ فەرمانبەرانی ئەو سنوورە، ئێستا دڵنیابووینەتەوە لە بەحرکەش ناتوانین پێیان بدەین.

چارەسەر: مەریوان هادی دەڵێت: بۆ چارەسەرکردنی ئەو کێشەیە قسەی لەگەڵ وەزیری شارەوانی کردووە، بەڵێنی داوە فەرمانبەرانی پیرزین و شاوێس و مەلائۆمەر بە یەک پاکێج بخرێنە سەر سەرۆکایەتی شارەوانی هەولێر، واتا شارەوانی ناوشار، ئیتر ئەوانیش هاوشێوەی فەرمانبەرانی سەنتەری هەولێر زەوییان پێدەدرێت.

تاوەکو ئێستاش فەرمانبەرانی ناوشار لە رێگای دهۆک و چەند شوێنێکی تر زەوییان پێدراوە، بۆ فەرمانبەرانی پیرزینیش بڕیار نەدراوە لە کوێی پێیان بدرێت، دەبێت دیراسە بکرێت.