گەشتیاران بە مۆبایلی کلاسیکەوە ڕوو لە ئەمریکا دەکەن و هۆكارەكەش ئاشكرا دەكرێت

ئاڤا نیوز

بەهۆی تووندبوونی ڕێکارە ئەمنییەکان لە خاڵە سنوورییەکانی ئەمریکا، دیاردەیەکی نوێ لەنێوان گەشتیاراندا سەری هەڵداوە و لە جیاتی مۆبایلە پێشکەوتووەکان گەشتیاران ڕوو لە بەکارهێنانی مۆبایلی کلاسیکی دەکەن.

وێنە گەورەکە: بەکارهێنانی مۆبایلی کلاسیک وەک تاکتیکێک لەلایەن گەشتیارانەوە بۆ پاراستنی تایبەتمەندی و زانیارییە کەسییەکان لەژێر چاودێری وردی کارمەندانی سنووری ئەمریکا پەیڕەو دەکرێت.

زانیاریی بەدەستهاتوو: بەپێی زانیاریی میدیاکانی ئەمریکا، کارمەندانی گومرگ و پاراستنی سنوورەکانی ئەمریکا دەتوانن بەبێ فەرمانی دادگا، داوای کۆدی مۆبایلی گەشتیاران بکەن و پشکنین بۆ وردەکاریی ژیانیان لە نامە و وێنەکانەوە تا دەگاتە ئیمەیڵ و هەژمارەکانی سۆشیاڵ میدیا بکەن. ئەم دەسەڵاتە وای کردووە گەشتیاران هەست بە نائارامی بکەن و پەنا بۆ ڕێگەی جیاواز ببەن بۆ ئەوەی بابەتە پەیوەندیدارە تایبەتەکانیان بپارێزێن.

زانیاریی زیاتر: گەشتیاران مۆبایلە پێشکەوتووەکانیان لە ماڵەوە بەجێدەهێڵن یان هەموو زانیارییەکانی دەسڕنەوە و لەگەڵ مۆبایلە پێشکەوتووەکەیان کە هیچ شتێکی تێدانەماوە مۆبایلێکی کلاسیکی کە چەند ژمارەیەکی پێویستی تێدایە دەبەنە ئەمریکا، دوای چوونە ناو سنووری ئەمریکا مۆبایلەکانیان دەخەنەوە کار و لە ڕێگەی ئینتەرنێتەوە زانیارییەکانیان دەگەڕێننەوە بۆ ناو مۆبایلەکانیان.

ئەوەی پێویستە بیزانیت: هەر گەشتیارێک ڕەتیبکاتەوە لەلایەن کارمەندانی گومرگ و پاراستنی سنوورەکانی ئەمریکا مۆبایلەکەی بپشکێندرێت ئەوە دەسەڵاتیان پێدراوە ڕێگە نەدەن گەشتیارەکە بچێتە ناو ئەمریکا و بینێرنەوە بۆ وڵاتەکەی.