هەڵمەتی چاندنی نیو ملیۆن دار بۆ سەوزکردنی دهۆک جێبەجێ دەکرێت

ئاڤا نیوز

 

لە ئاسمانی شاری دهۆک، نیو ملیۆن خڕۆکەی خاک (تۆپە قوڕ) فڕێدرانە خوارەوە بۆ سەوزکردنی سرووشت و چیاکانی ئەو پارێزگایە، هەر خڕۆکەیەک نزیکەی 12 جۆر تۆوی تێدا بووە.

 

چیرۆکی سەرەکی: جێبەجێکردنی پلانی هەڵدانە خوارەوەی تۆوی دار، لە سنووری ناحیەی زاویتەی سەر بە پارێزگای دهۆک ئەنجامدرا، ڕێوڕەسمی چاندن و سەوزکردنی ژینگە، بە چاودێریی د. عەلی تەتەر، پارێزگاری دهۆک و بە ئامادەبوونی ئەحمەد جەمیل، بەڕێوەبەری گشتیی کشتوکاڵی دهۆک ئەنجام درا. 

لێدوانی فەرمی: ئەحمەد جەمیل، بەڕێوەبەری گشتیی کشتوکاڵی دهۆک، بە ئاڤا ڕاگەیاند، لە قۆناغی یەکەم زیاتر لە 500 هەزار خڕۆکەی خاک لە ئاسمانەوە لە ڕێگەی هێلیکۆپتەر هەڵدرانە خوارەوە، بەسەر چیاکانی زاویته‌، سپیرێز، زاوا و ده‌وروبه‌ری دهۆک بڵاو کرانەوە، دەشڵێت، ئەم دارانە لە وەرزی بەهار سەوز دەبن.

 

- لە قۆناغی دووەم، نیو ملیۆن خڕۆکەی دیکە لە ناوچەکانی دیکەی پارێزگای دهۆک هەڵدەدرێنە خوارەوە، لە ساڵانی داهاتووش ئەم هەڵمەتە بەردەوام دەبێت.

-تۆوەکان لە چەندین جۆری داری چیایی پێکدێن، وەکوو، سماق، کاژی زاویتە (داری سنۆبەر)، تەراش، گوهیشک و ئەرخەوان.

- ئەم جۆرە بیرۆکانە پێشتر لە وڵاتانی ئەوروپا جێبەجێکراوە و سەرکەوتووش بووە.

 

زانیاریی زیاتر: ڕێکخراوی (زیلا) خاوەن بیرۆکەی پرۆژەکەیە، یەکەمجارە لەسەر ئاستی عێراق و هەرێمی کوردستان بەم شێوازە هەڵمەتی چاندن و سەوزکردنی ژینگە ئەنجام دەدرێت.