حکومەتی عێراق بڕیاری دا کارتەکانی مۆبایل و ئینتەرنێت 20% گران بکات

ئاڤا نیوز

 

حکومەتی عێراق بڕیاری دا، لە ساڵی نوێ هەموو جۆرە کارتەکانی مۆبایل و ئینتەرنێت بە ڕێژەی %20 گران بکات.

 

وێنە گەورەکە: لە کۆبوونەوەی ئەنجوومەنی وزاری لە ڕۆژی دووشەممە، 15ی ئەم مانگە پێشنیازی گرانکردنی هەموو جۆرە کارتەکانی مۆبایل و ئینتەرنێت کراوە، دواتر بڕیارەکە لە ئەنجوومەنی وەزیرانی عێراق پەسەند کراوە، ئاراستەی هەموو لایەنە پەیوەندیدارەکان کراوە بۆ ئەوەی لە ساڵی 2026 جێبەجێی بکەن.

 

لێدوانی فەرمی: دیلان ڕەشاد، گوتبێژی وەزارەتی گواستنەوە و گەیاندن بە ئاڤای ڕاگەیاند، بڕیارەکە کۆمپانیا ناوخۆییەکانی ئینتەرنێت ناگرێتەوە ئەوانەی مۆڵەتیان لە حکومەتی کوردستان وەرگرتووە، بەڵام بڕیارەکە کۆمپانیاکانی مۆبایل، وەکو کۆڕەک و ئاسیا و زەین و هەموو کۆمپانیا گەورەکانی ئینتەرنێت دەگرێتەوە.

 

زانیاریی زیاتر: نرخی نوێی کارتەکانی مۆبایل و ئینتەرنێت بەم شێوازە دەبێت: کارتێکی پێنج هەزاری دەبێتەوە شەش هەزار، کارتێکی 10 هەزاری دەبێتە 12 هەزار، کارتێکی ئینتەرنێتی 30 هەزاری دەبێتە 36 هەزار دینار، ئەمە جگە لەم پارەیەی مارکێتەکان وەکو قازانج وەریدەگرن، بڕی 250، 500 یان هەزار دینارە.

 

ئەمەش بزانە: خۆی پێشتر ئەو باجە هەبوو، ساڵی 2022 ئەنجوومەنی وەزیرانی عێراق لای برد، ئێستاش ئەگەر کۆمپانیاکان خۆیان ئەو باجە نەدەن، دەبێت خەڵک بیدات.