پۆلیسی ڕانیە دوو کەس دەستگیر دەکات؛ دوو ساڵە دزی لە فرۆشگای قوتابخانەیەک دەکەن

ئاڤا نیوز

لە ڕانیە دوو کەس لەسەر دزیکردن دەستگیر کران، دەرکەوت ماوەی دوو ساڵە دزی لە فرۆشگای قوتابخانەیەک دەکەن.

چیرۆکی سەرەکی: ڕۆژی 18-12-2025 خاوەنی فرۆشگای قوتابخانەکانی سەفین و ڕاپەڕین کە هەردوو قوتابخانەکە لەناو یەک باڵەخانەن، دەچێتە نوسینگەی نەهێشتنی  تاوانی ڕانیە و سکاڵا تۆمار دەکات کە پارەیەکی زۆر و بڕێکی زۆر خواردنی ناو فرۆشگاکەی لێ دزراوە.

لێدوانی فەرمی: شۆڕش ئیسماعیل، وتەبێژی پۆلیسی ڕاپەڕین بە ئاڤای ڕاگەیاند، بەشی پۆلیسی نەهێشتنی تاوانی ڕاپەڕین لێکۆڵینەوەی لە سکاڵای ئەو هاونیشتمانییە دەستپێکرد، دوو تۆمەتبار دەستگیر کران، لەکاتی لێکۆڵینەوە لەگەڵیاندا دانیان ناوە بە تاوانەکەیاندا و بە وتەی خۆیان، لە مانگی 9ـی ساڵی 2023ـەوە تاوەکو ڕێکەوتی 20-12-2025 بە کاتی جیاجیا بەڕێژەیەکی زۆر کە نەتوانراوە هـەژمار بکرێت دزییان لە فرۆشگای ئەو قوتابخانەیە کردووە و پارەیەکی زۆر و خواردنی فرۆشگاکەیان دزیوە.

زانیاریی زیاتر: ئەو دوو تۆمەتبارە یەکێکیان تەمەنی 18 ساڵە و ئەوەی دیکەیان لە تەمەنی نەوجەوانییە و هەردووکیان لە ڕەگەزی نێرن، بەبڕیاری دادوەر و بە ماددەی 443 لە یاسایی سزادانی عێراقی تۆمەتباران ڕاگیران.