ژمارەی کوژراو و بریندارانی تەقینەوەکەی حومس بەرز دەبێتەوە

ئاڤا نیوز

ڕوانگەی سووری بۆ مافەکانی مرۆڤ دوایین ئاماری تەقینەوەکەی مزگەوتێکی پێكهاتەی عەلەوییەکان لە شاری حومس ئاشکرا کرد، بەپێی ئامارەکە 35 کەس کوژران و بریندار بوون.

چیرۆکی سەرەکی: ئەمڕۆ هەینی، تەقینەوەیەک لە مزگەوتی ئیمامی عەلی لە پارێزگای حومس لە ناوەڕاستی سووریا ڕوویداوە و چەندین کوژراو و برینداری لێکەوتووەتەوە، دواتر گرووپێکی تووندڕەوی سووری بەناوی "سەرایا ئەنساری سوننە" بەرپرسیارێتیی خۆی لە تەقینەوەکە ڕاگەیاند.

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند: ژمارەی کوژراوانی تەقینەوەکەی حومس بۆ هەشت کەس بەرزبووەتەوە و 27 کەسی دیکەش برینداربوون کە سیانیان منداڵن و باری تەندروستیی هەندێکیان ناجێگیرە.

زانیاریی زیاتر: ئاژانسی هەواڵی فەرمیی حکومەتی سووریا (سانا) لە زاری سەرچاوەیەکی ئەمنییەوە ڕاگەیاند، لێکۆڵینەوە سەرەتاییەکان ئاماژە بەوە دەکەن بۆمبی چێنراو لەناو مزگەوتەکەدا دانراوە و لە کاتی کۆبوونەوەی نوێژخوێنان بۆ وتاری هەینی تەقێنراوەتەوە.