سەرۆکی جەهەپە: بڕیاری نەچوونمان بۆ لای ئۆجەلان دروست بوو

ئاڤا نیوز

سەرۆکی جەهەپە بڕیاری نەچوونیان بۆ لای عەبدوڵڵا ئۆجەلان بۆ دوورگەی ئیمراڵی بە بڕیارێکی دروست دەزانێت و دەڵێت: ویستیان بە جۆرێک مامەڵەمان لەگەڵ بکەن کە 'ئەگەر نەیەنە ئیمراڵی، لە کۆمیسیۆن دەرتاندەکەین'، بەڵام ئێستا هەموو لایەک لە گرنگی بوونی جەهەپە لە کۆمیسیۆنەکە تێدەگات.

بۆچی گرنگە: جەهەپە دەیەوێت خۆی وا نیشان بدات کە نە بە تەواوی دژی پرۆسەکەیە و نە بە تەواویش بەرامبەر مەرجی لایەنەکانی دیکە هاتووەتە سەر چۆک. ئۆزەل بەم قسەیە دەیەوێت جەخت لەسەر سەربەخۆیی بڕیاری حزبەکەی بکاتەوە.

لێدوانی فەرمی: ئۆزگور ئۆزەل، سەرۆکی جەهەپە لە چاوپێکەوتنێکدا لەگەڵ ڕۆژنامەی نەفەس جەخت لەوە دەکاتەوە ئەوان باوەڕیان بە بوونی کێشەی کورد هەیە و لەگەڵ ئەوەدان بە ڕێگاچارەی دیموکراتییانە چارەسەر بکرێت.

هاوکات دەڵێت، چارەسەرکردنی پرسی کورد و بە دیموکراتیزەکردنی تورکیا دووانەیەکی لێکدانەبڕاون و ناکرێت دیموکراتیزەکردنی تورکیا بخرێتە دوای چارەسەرکردنی پرسی کورد و دەڵێت: ئەم تێڕوانینە هەڵەیە و متمانە لای خەڵک دروست ناکات.

لەلایەکی دیکەوە: ئۆزگور ئۆزەل بە ناڕاستەوخۆ وەڵامی ئەردۆغانی دایەوە کە ئاماژەی بەوە دابوو ڕاپۆرتەکەی جەهەپە هیچ جددییەتێکی پێوە دیار نییە بۆ چارەسەری پرسی کورد دەڵێت: ئەوان بە چاویلکەی ڕەش لە ڕاپۆرتەکەی ئێمە دەڕوانن، کەچی بە چاویلکەی پەمەیی سەیری ڕاپۆرتی ئەو پارتانە دەکەن کە دان بە کێشەی کورددا نانێن.

بەگوتەی سەرۆکی جەهەپە بەپێی ڕاپرسییەکان، بۆچوونی خەڵک و بەتایبەتی دەنگدەرانی خۆیان، بڕیاری نەچوونی نوێنەری جەهەپە بۆ ئیمراڵی بە دروست زانراوە، دەڵێت: دەرکەوتووە هەم بەشداریکردنمان لە کۆمیسیۆنە پەرلەمانییەکە و هەم نەچوونمان بۆ ئیمراڵی، بڕیارێکی دروست بووە.