توێژینەوەیەکی شۆکهێنەر: وردیلە پلاستیکیەکان پیاوان تووشی نەخۆشیی دڵ دەکەن

ئاڤا نیوز

توێژینەوەیەکی نوێ دەری دەخات، وردیلە پلاستیکیەکان دەتوانن لەناو خوێنبەرەکاندا بنیشن و مەترسیی تووشبوون بە نەخۆشییەکانی دڵ زیاد بکەن بە تایبەتی لە پیاواندا.

چیرۆکی سەرەکی: وردیلە پلاستیکیەکان لە هەموو شوێنێک هەن، لە خۆراک، ئاو و تەنانەت هەواشدا. پێشتر زانراوە کە دەچنە ناو سووڕی خوێنەوە، بەڵام ئەمە یەکەمجارە بەم شێوەیە پەیوەندیی ڕاستەوخۆیان لەگەڵ نەخۆشیی دڵدا دەسەلمێنرێت.

لێدوانی فەرمی: دکتۆر چانگچێنگ ژۆو، سەرپەرشتیاری توێژینەوەکە، دەڵێت، خۆپاراستنی تەواو لە وردیلە پلاستیکیەکان نزیکە لە ئەستەمەوە. بۆیە کەمکردنەوەی بەرکەوتن و پاراستنی تەندروستیی دڵ و خوێنبەرەکان لە ڕێگەی وەرزش و خۆراکی تەندروستەوە بە گرنگ دەزانێت، دەشڵێت، جیاوازییەکی سەرسوڕهێنەریش ئەوەیە کاریگەرییەکان زیاتر لەسەر ڕەگەزی نێر دەردەکەوێت، ئەمەش ڕێگە خۆش دەکات بۆ دۆزینەوەی هۆکارە پارێزەرەکان لە جەستەی مێینەدا.

وردەکاریی توێژینەوەکە: توێژەران لە زانکۆی کالیفۆرنیا، تاقیکردنەوەیان لەسەر ئەو مشکانە کردووە کە لە ڕووی بۆماوەییەوە ئامادەیی تووشبوونیان بە ڕەقبوونی خوێنبەرەکان هەیە. بۆ توێژینەوەکە مشکەکان خراونەتە سەر بەرنامەیەکی خۆراکی کەم چەوری و کەم کۆلیسترۆڵ. بۆ ماوەی نۆ هەفتە، بڕێک وردیلە پلاستیکیان پێدراوە کە هاوتایە لەگەڵ ئەو بڕەی مرۆڤ لە ڕێگەی خۆراک و ئاوەوە وەریدەگرێت.

بۆچی گرنگە: ئەم توێژینەوەیە "بەهێزترین بەڵگەیە" بیسەلمێنێت وردیلە پلاستیکیەکان ڕاستەوخۆ دەبنە هۆی نەخۆشیی دڵ.

ئەنجامەکان چی دەڵێن: دەرکەوتووە لە مشکە نێرەکاندا کەڵەکەبوونی چەوری لە شاخوێنبەرەکاندا بە ڕێژەی %63 زیاد بووە. لە هەندێک خوێنبەری تردا، زیانەکە حەوت هێندە زیاتر بووە، بەڵام بۆ مشکە مێیەکان دۆخەکە جیاوازە و زیاتر کەڵەکەبوونی چەوری بەم جۆرە نەبووە، توێژەران بۆیان دەرکەوتووە، وردیلە پلاستیکیەکان زیان بەو خانانە دەگەیەنن کە ناوپۆشی خوێنبەرەکان پێکدەهێنن، ئەمەش دەبێتە هۆی هەوکردن.