دوای ئاهەنگەکانی شەوی سەری ساڵ 55 تۆن زبڵ و خاشاک کۆکراونەتەوە

ئاڤا نیوز

لە دوای ئاهەنگەکانی شەوی سەری ساڵ، هەڵمەتێک بۆ پاککردنەوەی ئەو شوێنانە ئەنجامدرا کە ئاهەنگیان لێ ساز کرابوو. تەنیا لە هەولێر و سلێمانی نزیکەی 55 تۆن پاشماوە کۆکراونەتەوە.

وێنە گەورەکە: بەبۆنەی ئاهەنگەکانی سەری ساڵی نوێ، لە شارەکان ژمارەیەکی زۆری هاونیشتمانی و گەشتیار لە شوێنە گشتییەکان کۆبوونەوە، بووە هۆی پیسبوونی ژینگە و کۆبوونەوەی زبڵ و خاشاکی زۆر.

لێدوانی فەرمی: ژیار جەلال، بەڕێوبەری خزمەتگوزاریی ژینگەپارێزی هەولێر بە ئاڤای ڕاگەیاند، دوای تەواوبوونی ئاهەنگەکانی سەری ساڵ لە شاری هەولێر، لە ڕێگەی چوار تیمەوە هەڵمەتێکی پاککردنەوە ئەنجامدرا کە تەنیا لە ناو بازاڕی ئیسکان و بازاڕی گەورەی شاری هەولێر 30 تۆن زبل و خاشاک و پاشماوەی خۆراک کۆکراونەتەوە.

لەلایەکی دیکەوە: زەردەشت ڕەفیق، وتەبێژی سەرۆکایەتیی شارەوانی سلێمانی بە ئاڤای ڕاگەیاند، نزیکەی 25 تۆن زبڵ و خاشاک و پاشماوە لە دوای شەوی سەری کۆکراونەتەوە. ئەو پاشماوانە لە شەقامی سالم و ئەو کۆڵانانەی کە بە دەوری شەقامەکەوەن، واتە لە سەرەتای هۆتێل سلێمانی پاڵاس، تاوەکو دەگاتە یانەی ئەندازیاران، کۆکراونەتەوە.

سەبارەت بە شاری دهۆک، شێروان مسەمم، وتەبێژی سەرۆکایەتیی شارەوانی دهۆک بە ئاڤای ڕاگەیاند، لەبەرئەوەی لە دهۆک هیچ شوێنێک بۆ ئاهەنگەکانی سەری ساڵ تەرخان نەکرابوو، بۆیە وەکو ڕۆژانی ئاسایی لە تەواوی سەنتەری دهۆک 465 تۆن زبل و خاشاک کۆکرانەوە. دەشڵێت، ڕۆژانە بەردەوام 460 تا 465 تۆن زبڵ و خاشاک لە سەنتەری شاری دهۆک کۆدەکرێنەوە.