بەهۆی بەفربارینی زۆر لە شارێکی باکووری کوردستان هاووڵاتیان ماڵەکانیان چۆڵ کرد

ئاڤا نیوز

لە وانی باکووری کوردستان بەهۆی زۆری بەفربارین و هەرەسی بەفر بڕیار درا بەشێک لە گەڕەکەکانی ئەو شارە چۆڵ بکرێت.

وێنە گەورەکە: ماوەی چەند ڕۆژێکە بەفربارینی بەردەوام شارەکانی باکووری کوردستانی گرتووەتەوە بە ڕادەیەک هەندێک ناوچە ئاستەنگی هاتووچۆی تێدا دروست بووە.

ڕاگەیێنراوی فەرمی: بەڕێوەبەرایەتی کارەسات و فریاگوزاری" AFAD" ڕایگەیاندووە: ئەمڕۆ پێنجشەممە لە ناوچەی چەتاکی وان ژنێک کەوتووەتە ژێر هەرەسی بەفرەوە، دوای گەڕانێکی زۆر توانرا بە هاوکاری هاووڵاتیان و هەوڵی تیمەکانی " AFAD" بە برینداری ڕزگار بکرێت و بگەیێنرێتە نەخۆشخانە، هاوکات حەوشەی ماڵێک بە تەواوی بوو بەژێر هەرەسی بەفرەوە، بۆیە بڕیاردراوە بە شێوەیەکی کاتی لەبەر بەفربارینی زۆر و دروستبوونی هەرەسی بەفر چەند گەرەکێک لە وان چۆڵ بکرێن.

زانیاریی زیاتر: هەر بەهۆی بەفربارین لە ناوچەی ئارتوینی باکووری ڕۆژهەڵاتی تورکیا لە نزیک سنووری جۆرجیا دوو شوان بێسەرشوێنن و گەڕان بەدوایاندا بەردەوامە و تیمەکانی فریاگوزاری تورکیا ڕایانگەیاند بەردەوام دەبین لە گەڕان بەدوای ئەوو دوو کەسەدا.