شێخ دارا: ڕۆژی هەینی بارانە و کۆتایی بە شەختەبەند دێت

ئاڤا نیوز

بەپێی پێشبینییەکانی شێخ دارا، ئەمشەو لە چەند ناوچەیەکی هەرێمی کوردستان بەفر دەبارێت و لە سلێمانیش باران دەبارێت. دەشڵێت لەم هەفتەیە شەپۆلێکی نوێی باران ڕوو لە هەرێمی کوردستان دەکات.

لێدوانی فەرمی: شێخ دارا، شارەزا و پێشکەشكاری کەشوهەوای ئاڤا ڕایگەیاند، سبەی پێنجشەممە کەشوهەوای هەرێمی کوردستان تا ڕادەیەک جێگیر دەبێت، ڕۆژی هەینی ئەگەری هەیە لە ناوچە شاخاوییەکان بەفر و باران ببارێت و شەپۆلێکی نوێی باران ڕوو لە هەرێمی کوردستان دەکات، بەو هۆیەوە پلەکانی گەرما نزم دەبنەوە و لەناو شارەکان کۆتایی بە بەستەڵەک و شەختەبەند دەهێنێت، ئەمەش دەبێتە یەکەم شەپۆلی دەریای سپی لە ساڵی نوێدا و دەبێتە هۆی بارینیبارانی پچڕ پچڕ لەناوچە جیاوازەکاندا.

ئاماژەی بە ئەوەشدا، ئەگەری هەیە ئەمشەو لە ناوچەکانی دەوروبەری دهۆک، ئاکرێ، زاخۆ، مێرگەسۆر، بلێ و بارزان و ئیدارەی سەربەخۆی سۆران بەفر و لە سلێمانیش کەمێک باران ببارێت ئەمەش دەبێتە کۆتا شەپۆلی بەفر و بارانی ساڵی 2025.

لەبارەی کەشوهەوای ڕۆژهەڵاتی کوردستان گوتی، لە چەندین شار مەترێک بۆ مەتر و نیوێک بەفر باریوە و لە شارەکان بە گشتی ئەمشەو بەفرێکی زۆر دەبارێت. لە باکوری کوردستانیش بەهۆی زۆری بەفربارین ئاستەگی هاتووچۆ دروست بووە.

لەلایەکی دیکەوە: بەڕێوەبەرایەتیی گشتیی کەشناسی هەرێمی كوردستان، بڵاوی کردووەتەوە، سبەی سەری ساڵی نوێ ئاسمانی هەرێمی کوردستان، هەوری تەواو دەبێت و کاریگەری شەپۆلی بەفربارین بەردەوام دەبێت لەسەر ناوچەکانی سنووری پارێزگای دهۆک، ئیدارەی سەربەخۆی زاخۆ، مێرگەسوور، ئامێدی، سنووری ئیدارە سەربەخۆکانی سۆران و ڕاپەرین و چیای سەفین لە پارێزگای هەولێر لە ناوچەکانی دیکەش باران دەبارێت.