چەند ئەفسەرێکی باڵای عێراق زیندانی دەکرێن و لە خزمەتیش دەردەکرێن

ئاڤا نیوز

دادگای سەربازی عێراق، بڕیاری کۆتایی لەبارەی کەیسی گیانلەدەستدانی ژمارەیەک خوێندکار لە سەربازگەی مەشقی شاری ناسرییە دەردەکات و تێیدا چەند ئەفسەرێکی باڵای بە زیندانیکردن و دەرکردن لە خزمەت سزا دەدات.

بڕیاری دادگا: بەپێی بڕیارەکەی دادگا، ناسر ئەحمەد غەنام ئەلهێتی، فەرماندەی کۆلێژی سەربازی چوارەم لە خزمەتی سەربازی دەرکرا و بە دوو ساڵ زیندانی سزا درا. هەریەک لە ستار جەبار ڕوبەیعی، ڕاگری کۆلێژی سەربازی چوارەم و نەشوان کەنعان عەلوان زوبەیدی فەرماندەی فەوج،  لە خزمەت دەرکران و بە سێ ساڵ زیندانی سزا دران.

ئەوەی پێویستە بیزانیت: سزادانی ئەو ئەفسەرانە بەپێی ماددەی 411/2 لە یاسای سزادانی عێراقی پەیوەست بە کەمتەرخەمی و گیانلەدەستدانی کەسانێک بەهۆیەوە هاتووە.

باکگراوند: ڕۆژی 21-05-2025، دوو قوتابی کۆلێژی سەربازی ناسرییە لە ئەنجامی بەرکەوتنی ڕاستەوخۆی خۆر و لەژێر تینی گەرما  بۆ ماوەی شەش کاتژمێری بەردەوام، گیانیان لەدەستدا و نۆ قوتابی دیکەش بەهۆی خراپی باری تەندروستییانەوە ڕەوانەی نەخۆشخانە کران.