شانەی ڕاگەیاندنی ئەمنی: ئەمساڵ دەست بەسەر زیاتر لە هەزار بەڵگەنامەی داعشدا گیراوە

ئاڤا نیوز

شانەی ڕاگەیاندنی ئەمنیی عێراق سەرکەوتنی چالاکییە میدیاییەکانی بۆ ساڵی 2025 ڕادەگەیێنێت و ئاشكرای دەكات كە لەو ماوەیەدا توانراوە دەست بەسەر زیاتر لە هەزار بەڵگەنامەی داعشدا بگیرێن.

چیرۆکی سەرەکی: ئەمڕۆ چوارشەممە، شانەی ڕاگەیاندنی ئەمنیی عێراق کۆمەڵێک چالاکی خۆی لە ساڵی 2025 بڵاوکردەوە، کە تایبەت بوو بە ڕووبەڕووبوونەوەی چالاکییە میدیاییەکانی ڕێکخراوی داعش و بەڕێوەچوونی هەڵبژاردنی پەرلەمانی عێراق.

لێدوانی فەرمی: فەریق سەعد مەعن، سەرۆکی شانەی ڕاگەیاندنی ئەمنی ڕایگەیاند: لە چوارچێوەی هەوڵە ئەمنییەکاندا، لە ساڵی 2025 دەست بەسەر هەزار و 41 بەڵگەنامەی داعشدا گیراوە کە پێکهاتبوون لە (وێنە، پۆستەر، ڤیدیۆ و فایل)، ئەمەش وای کردووە وێنەی ڕاستەقینەی ڕێکخراوەکە وەک گرووپێک کە پشت بە هێرشی سنووردار و پشتیوانی دارایی بەخشینەکان دەبەستێت، ئاشکرا ببێت.

لەلایەکی دیکەوە: سەبارەت بە هەڵبژاردنەکانی پەرلەمانی 2025، شانەکە کاری کردووە بۆ سنووردارکردنی گوتاری ڕق و کینە، بەرەنگاربوونەوەی هەواڵی ناڕاست، هاندانی هێزە ئەمنییەکان بۆ دەنگدانی ئازادانە و بەشداریی کارای هاووڵاتیان لە پرۆسەی سیاسییدا.

ژمارەكان وادەڵین: شانەکە سەبارەت بە چالاکییەکانی کۆمەڵێک ئاماری بڵاوکردەوە:

٠ ئاماری گشتی: چاودێریکردنی 6 هەزار و 100 هەواڵ، پووچەڵکردنەوەی 3 هەزار و 916 پڕوپاگەندە و بڵاوکردنەوەی 318 ڤیدیۆی هۆشیاری.

٠ چالاکییەکانی هەڵبژاردن: ئەنجامدانی 23 وۆرک شۆپ، 79 چاوپێکەوتنی تەلەڤزیۆنی و چاودێریکردنی 752 پڕوپاگەندەی تایبەت بە هەڵبژاردن.