یانەی هەولێر گرێبەستی پیشەگەرێكی ئۆزباكی دەكاتە دیاری ساڵی نوێ بۆ هاندەرانی

ئاڤا نیوز

یانەی هەولێر لە یەكەم ڕۆژی ساڵی نوێ دا، واژۆكردنی گرێبەستی پیشەگەرێكی ئۆزباكی كردە خەڵاتی هاندەرانی.

چیرۆكی سەرەكی: بەمەبەستی پارێزگاریكردن لە پێشەنگی یانەكانی خولی ئەستێرەكانی عێراق، یانەی هەولێر لەماوەی گواستنەوەی زستانە ژمارەیەك گرێبەستی نوێ واژۆ دەكات، ئەمڕۆ پێنجشەممە 1-1-2026، سەرۆكی یانەی وەرزشی هەولێر واژۆی لەسەر گرێبەستی مارلین چۆبانۆڤ، یاریزانی پیشەگەری ئۆزباكی كرد، ئەو یاریزانە لە یەكەم مەشقی یانەی هەولێر بەشداریكرد و لەلایەن هاوڕێكانییەوە پێشوازی لێكرا.

لێدوانی فەرمی: سەفین یاسین، سەرۆكی یانەی هەولێر ڕایگەیاند، هەروەك پێشتر بەڵێنمان دابوو لە كاتی گواستنەوەی زستانەدا كە دەرگای هێنانی یاریزانی نوێ دەكرێتەوە، ژمارەیەك یاریزانی پیشەگەر بهێنینە ڕیزەكانمان؛ ئەمڕۆ گرێبەستمان لەگەڵ پیشەگەرێكی بەرگریكار واژۆكرد كە لە ئۆزباكستانەوە هاتووە و لە یارییەكانی داهاتوودا، درێسە زەردەکەی یانەی هەولێر دەپۆشێت.

زانیاریی زیاتر: چۆبانۆڤی ئۆزباكی تەمەن 25 ساڵ، لە هێڵی بەرگری یاری دەكات و لە یانە زەردپۆشەكە درێسی ژمارە 14 دەپۆشێت و دەبێتە یەكەم گرێبەستی ماوەی گواستنەوەی زستانەی یانەی هەولێر.

ئەوەی پێویستە بیزانیت: هەولێر لەم وەرزە بە سەرەتایێكی ناوازە، خولی ئەستێرەكانی دەستپێكردووە و تا ئێستا لە كۆی ئەو نۆ یارییەی ئەنجامدراوە، حەوت یاری بردووەتەوە و لە دوو یاریشدا یەكسان بووە، 21 خاڵی كۆكردووەتەوە و لە پێشەنگی یانەكان دەبینرێت.