نەتەوە یەکگرتووەکان لە عێراق دەکشێتەوە و دەڵێت هاوبەشییەکانمان بەردەوام دەبێت

ئاڤا نیوز

 

هەرچەندە بە فەرمی لە عێراقدا کۆتایی بە ئەرکەکانی هات، تیمی نەتەوە یەکگرتووەکان جەخت لە بەردەوامی و بەهێزیی هاوبەشییەکانیان لەگەڵ حکومەتی عێراق دەکاتەوە و دەڵێت" لە چەند بوارێکی گرنگدا لە پاڵپشتیکردنی عێراق بەردەوام دەبن".

 

چیرۆکی سەرەکی: نەتەوە یەکگرتووەکان لە بەیاننامەیەکدا ڕایگەیاند: لەگەڵ کۆتاییهاتنی ئەرکی نێردەی (یۆنامی)، تیمی ڕێکخراوەکە لەژێر سەرپەرشتی ڕێکخەری نیشتەجێی نەتەوە یەکگرتووەکان لە کارەکانی بەردەوام دەبێت.

 

قۆناغی داهاتوو: بەگوێرەی بەیاننامەکە، نەتەوە یەکگرتووەکان لە چەند بوارێکی گرنگدا بەردەوام دەبێت لە پاڵپشتیکردنی عێراق، لەوانە: هەمەجۆرکردنی ئابووری، ڕووبەڕووبوونەوەی گۆڕانی کەشوهەوا، بەڕێوەبردنی سەرچاوە ئاوییەکان، بەهێزکردنی پاراستنی کۆمەڵایەتی، حوکمڕانی و دۆزینەوەی چارەسەری بەردەوام بۆ کێشەکان.

 

زانیاری زیاتر: ئەم هاوکارییانە لە چوارچێوەی ڕێککەوتنی هاوکاری گەشەپێدانی بەردەوام (2025-2029) دا ڕێکخراون، کە لە 25ـی کانوونی یەکەمی 2024 لە نێوان عێراق و نەتەوە یەکگرتووەکاندا واژۆ کراوە، ئامانجی ڕێککەوتنەکەش هەماهەنگییەکی نزیکە بۆ بەدیهێنانی ئامانجەکانی گەشەپێدان لە بوارە جیاوازەکاندا.

 

باکگراوند: نێردەی (یۆنامی) کە لە ساڵی 2003ـەوە لە عێراق کار دەکات، لەسەر داوای حکومەتی عێراق و بە بڕیاری ئەنجوومەنی ئاسایش، لە 31ـی کانوونی یەکەمی 2025 بە فەرمی کۆتایی بە ئەرکەکانی لە عێراق هێنا، ئەم هەنگاوەش وەک دەستپێکی قۆناغێکی نوێ لە پەیوەندییەکانی نێوان عێراق و نەتەوە یەکگرتووەکان هەژمار دەکرێت.