حەوت حاڵەتی دزیکردن لەلایەن کارگوزارە بیانییەکان لە هەولێر تۆمار دەکرێن

ئاڤا نیوز

 

ئەمساڵ چەند حاڵەتێکی دزیکردن لەلایەن کارگوزارە بیانییەکان کە لە کۆمپانیا و ماڵەکاندا لە هەولێر کار دەکەن ڕوویانداوە. پۆلیسی هەولێریش پشتڕاستی دەکاتەوە.

 

وێنە گەورەکە: ئەمساڵ حەوت حاڵەتی دزیکردن لەلایەن ئەو کارگوزارە بیانییانە ڕوویداوە کە لە کۆمپانیا و ماڵەکاندا لە شاری هەولێر کاردەکەن، ئەویش بە بردنی پارە و زێڕ بووە کە قاسەکانیان بڕیوە و هەڵهاتوون.

 

لێدوانی فەرمی: سەرچاوەیەکی ئاگادار لە بەڕێوەبەرایەتیی پۆلیسی هەولێر ڕاگەیاند:  ئەو کەسە بیانیانەی کار دەکەن، گرێبەستیان لەگەڵ ماڵەکان و کۆمپانیاکان هەیە، هەروەها کۆپی پاسەپۆرت و ئیقامەیان لای ئەو کۆمپانیایە هەیە کە بۆ کوردستانی هێناون، بۆیە بە بەکارهێنانی ئەوانە دەتوانرێت گشتاندن بۆ فەرمانی دەستگیرکردنیان بکەین، لەهەمانکاتدا بەرلەوەی چووبێتنە دەرەوە، دەتوانین قەدەغەی چوونە دەرەوەیان لە فڕۆکەخانە و خاڵە سنوورییەکان بۆ بکەین.

 

بە وتەی سەرچاوەکەی پۆلیس، لەو حەوت حاڵەتە تەنیا یەک حاڵەتی دەستگیرکردن هەبووە، ئەویش کاری بۆ ژنێکی ئێرانی کردووە و بە چەند جارێک لەو پارەیەی بردووە کە لە ماڵەکەدا هەبووە، پلانی دانابوو لە ماوەی سێ ڕۆژدا هەڵبێت، بەڵام لە ڕێی کامێرای چاودێرییەوە پێی زانراوە و دەستگیر کراوە.

 

زانیاریی زیاتر: لەو حەوت دزییەی ئەمساڵ تۆمارکراون، بەشێک لەو شتانەی بردوویانە بەم جۆرە بووە: 77 وەرەقە، 123وەرەقە، حەوت مسقاڵ زێڕ و پێنج ملیۆن و 500 هەزار دینار.

 

ئەمەش بزانە: لەنێو ئەو کارگوزارانە، فلیپینی، ئەسیوبی، بەنگلادشی و ئەندەنووسی هەبوون.