لە سلێمانی مۆنۆمێنتی "کەزی" دروست دەکرێت

ئاڤا نیوز

لە سلێمانی پێشنیاز بۆ دروستکردنی مۆنۆمێنتی کەزی دەکرێت. پارێزگاری سلێمانیش پێشنیازەکە قبووڵ دەکات و دەڵێت، "لە ڕۆژانێکی نزیکدا کاری شایستەی لەسەر دەکەین".

چیرۆکی سەرەکی: هۆنینەوەی کەزی لە کوردستان بووە بە سیمبوڵی بەرخودان و کولتووری ئازایەتی، خانمان قژیان دەکەن بە کەزی بۆ پاڵپشتی شەڕڤانان و کوردانی ڕۆژئاوا، بە بەڕێوەچوونی چالاکی و ئیڤێنتی جۆراوجۆریش لە شارە جیاوازەکانی کوردستان، هاووڵاتیان پاڵپشتی خۆیان بۆ ڕۆژئاوا دووپات دەکەنەوە. 

لێدوانی فەرمی: د. هەڤاڵ ئەبوبەکر، پارێزگاری سلێمانی ڕایگەیاند، مۆنۆمێنتی "کەزی" لەسەر پێشنیاز و دەستپێشخەریی هونەرمەند دڵشاد بەهادین بوو، "پشتیوانی لەو پێشنیازە دەکەین و لە ڕۆژانێکی نزیکدا بەڕاوێژ لەگەڵ سەرۆکایەتیی و ئەنجوومەنی شارەوانیی سلێمانی و بەڕێوەبەرایەتیی گشتیی ڕۆشنبیریی و هونەری سلێمانی، هەروەها پشتیوانان و دەستەبژێرانی ئەم بوارەدا، کاری شایستەی لەسەر دەکەین."

پارێزگاری سلێمانی دەشڵێت: "ناومان لە مۆنۆمێنتەکە ناوە، مۆنۆمێنتی کەزی، مۆنۆمێنتی شکۆ، ڕۆژی یەکبوونی نەتەوەیی و نیشتمانیی و بەرخۆدان و سەرکەوتنی کوردستان."

لەلایەکی دیکەوە: ئەمڕۆ چوارشەممە 28-1-2026، ئومێد خۆشناو، پارێزگاری هەولێر لە کۆبوونەوەی لەگەڵ ئەندامانی ئەنجوومەنی شارەوانیی هەولێر، پێشنیازی ناونانی چوارڕێانێکی هەولێری بەناوی "کەزی" کرد و پێشنیازەکەی پەسەند کرا.