دەزگای خێرخوازیی بارزانی لەماوەی هەفتەیەک هاوکاری دەگەیێنێتە زیاتر لە نۆ هەزار خێزان

ئاڤا نیوز 

ماوەی هەفتەیەکە دەزگای خێرخوازیی بارزانی بە 12 تیمی مەیدانی کە 150 کارمەند لەخۆدەگرێت، بەمەبەستی کۆمەک و هاوکاریکردنی ئاوارەکان، لەناو خاکی ڕۆژئاوای كوردستانن و بە تامەزرۆییەوە پێشوازییان لێدەکرێت.

لێدوانی فەرمی: ستاف ئاسۆ، بەرپرسی ئۆفیسی هەولێری دەزگای خێرخوازیی بارزانی، بە ئاڤا میدیای وت: خەڵکی ڕۆژئاوای كوردستان بە دڵێکی گەرم و پڕ لە شانازی و بە ئاڵای کوردستانەوە پێشوازی لە تیمەکانی دەزگای خێرخوازیی بارزانی و هاوکارییە مرۆییەکانی دەکەن.

لەلایەکی دیکەوە: دیار مەلا خدر، سەرپەرشتیاری یەکێک لە تیمە مەیدانییەکانی دەزگای خێرخوازیی بارزانی لە ڕۆژئاوای کوردستان، بە ئاڤا میدیای ڕاگەیاند: "دیمەنی هاتن و چوون و تێپەڕبوونی کاروانی ئۆتۆمبێل و بارهەڵگرەکانی دەزگای خێرخوازیی بارزانی لەناو گەڕەک و کۆڵان و شەقامەکانی قامیشلۆ، دێرکێ، عامودا، گرکێ لەکێ، تربەسپی و درباسیە، هەستێکی خۆشی کوردانە دەبەخشن، کاتێک دەبینین منداڵ، گەنج، پیر، ژن، پیاو، بە دڵخۆشییەکی زۆر و جۆشوخرۆشەوە پێشوازیمان لێدەکەن، هەموو ماندووبوونێک لەبیر دەکەین."

زانیاریی زیاتر: تیمەکانی دەزگای خێرخوازیی بارزانی لە ڕۆژئاوای كوردستان، بەردەوامن لە گەیاندنی هاوکارییەکان و لەماوەی هەفتەیەکدا، نۆ هەزار و 180 خێزان، کە 57 هەزار و 955 كەس لەخۆدەگرێت، لە هاوکارییەکان سوودمەندبوونە، کۆمەک و هاوکارییە مرۆییانەی خوارەوەیان پێشکەش کردووە:

٠ 165 بارهەڵگر هاوكاریی جۆراوجۆری خۆراكی لەوانە مریشك، ماست و پێدوایستی سەرەکی.
٠ دابەشكردنی هاوكاریی، سەبەتەی خۆراك، دۆشەك، بەتانی، پێداویستیی تەندروستی. 
٠ سووتەمەنی، گەیێنراوەتە 82 قوتابخانە کە ئاوارەکان وەکو شوێنی حەوانەوە بەکاریدەهێنن.
٠ دەرفەتی كار بۆ 289 كەس ڕەخسێنراوە.
٠ دابەشكردنی 145 هەزار و 177 لتر گازوایل، وەک نەوتی سپی بەکاردەهێنرێت.
٠ دابەشكردنی نۆ هەزار و 330 ژەمە خواردنی گەرم لە حەوت قوتابخانە و سێ مزگەوت.
٠ تیمی تەندروستیی دەزگا، چارەسەری پزیشكی بۆ دوو هەزار و 749 کەس کردووە.