میدیاکانی ئەوروپا: فەرەنسا زانیاریی هەواڵگریی دژی دیمەشق داوەتە هەسەدە

ئاڤا نیوز 

 

ژمارەیەک لە میدیاییەکانی ئەوروپا باس لەوە دەکەن دەزگا هەواڵگرییەکانی فەرەنسا ڕاستەوخۆ لە مەیدانی شەڕدا هاوکاریی هێزەکانی سووریای دیموکرات (هەسەدە) دەکەن و پاریس ئەوان بە "هاوسەنگەری" خۆی دەزانێت.

زانیاریی بەدەستهاتوو: بەپێی گۆڤاری "لۆ پۆینت"ی فەرەنسی، پشتیوانییەکانی فەرەنسا بۆ هەسەدە لە سەرەتای مانگی کانوونی دووەمی ئەمساڵەوە، هاوکات لەگەڵ دەستپێکردنی شەڕ و ئاڵۆزییەکان، چڕ بوونەتەوە.

- لەو کاتەوە بنکە سەربازی و هەواڵگرییەکانی فەرەنسا لە ناوچەکە خراونەتە حاڵەتی ئامادەباشییەوە و زانیارییە هەواڵگرییەکانیان داوەتە هەسەدە.

ئەوەی پێویستە بیزانیت: ئیمانوێل ماکرۆن، سەرۆککۆماری فەرەنسا پەیامێکی ڕوونی داوە و ڕایگەیاندووە بە پێچەوانەی ئەمریکا، ئەوان دەستبەرداری کورد و هەسەدە نابن. 

- ماکرۆن هەوڵێکی زۆری داوە وەک ناوبژیوان لە نێوان ئەحمەد شەر‌ع، سەرۆککۆماری کاتیی سووریا و مەزڵووم عەبدی، فەرماندەی گشتیی هەسەدە ڕۆڵ بگێڕێت، بە ئامانجی سووککردنی گەمارۆی سەر کۆبانێ و دۆزینەوەی چارەسەرێکی سیاسی.

زانیاریی زیاتر: ڕۆژنامە فەرەنسی و ئەڵمانییەکان، لەوانەش "فرانکفۆرتەر ئەلگەمایینە"، ئاماژە بەوە دەدەن سوپا و دەزگا هەواڵگرییەکانی فەرەنسا، شەڕڤانانی هەسەدە وەک "هاوسەنگەری" خۆیان لە شەڕی دژی داعش دەبینن و پەیوەندییەکی مێژوویی و مەیدانیی قووڵ لە نێوانیاندا هەیە.

-میدیا ئەڵمانییەکان بڵاویان کردووەتەوە، فەرەنسا نیگەرانە لەوەی ڕۆڵی هەسەدە لە شەڕی داعش کۆتایی پێ بهێنرێت و ئەم ئەرکە بە گرووپە چەکدارەکانی سوپای عەرەبیی سووریا بسپێررێت. 

- هەروەها ئاماژە بەوە دراوە پاریس هەراسانە لەوەی دۆناڵد ترەمپ، سەرۆکی ئەمریکا زۆر بە خێرایی لە لایەن ڕەجەب تەیب ئەردۆغانەوە قایل کراوە کە پاشەکشە بە هێزەکانی بکات، ئەمەش وەک هەڕەشەیەک بۆ سەر بەرژەوەندییەکانی فەرەنسا لە ناوچەکەدا دەبینرێت.