وەزارەتی بازرگانیی لەبارەی بەرزبوونەوەی بەهای دۆلار هۆشداری بە بازرگانان دەدات

ئاڤا نیوز

 

بریکاری وەزارەتی بازرگانی، دەڵێت ناجێگیری بەهای دۆلار کاریگەری لەسەر نرخی کاڵاکان دەبێت، بەڵام چاودێریی بازاڕ دەکەین و ڕێگری لە قورخکاری دەکەین.

وێنە گەورەکە: سەربەیانیی ئەمڕۆ لەگەڵ کرانەوەی بازاڕی دراودا، بەهای دیناری عێراقی بەرامبەر بە دۆلاری ئەمریکی جارێکی دیکە ڕووی لە دابەزین  کرد. بەجۆرێک بەهای دیناری عێراقی بەرامبەر بە دۆلاری ئەمریکی، هەزار و 500 دینار لە نرخەکەی دابەزی. بەمەش ئێستا 100 دۆلار بەرامبەر بە 155 هەزار و 500 دیناری عێراقی مامەڵەی پێوە دەکرێت. دۆناڵد ترەمپ ڕایگەیاند ئەگەر بەرژەوەندییەکانی ئەمریکا لەبەرچاو نەگیرێت و نووری مالیکی حکومەت پێکبهێنێت، ئەوا هاوکارییەکانی ئەمریکا بۆ عێراق ڕادەگیرێت.

لێدوانی فەرمی: سەروەر کەمال هاواری، بریکاری وەزارەتی بازرگانی و پیشەسازیی هەرێمی کوردستان بە ئاڤا میدیای گوت: ناجێگیریی نرخی دۆلار کاریگەری ڕاستەوخۆ و ناراستەوخۆ لەسەر ژیانی هاونیشتمانیان و نرخی کاڵاکان دەبێت، 90ـێ کاڵاکانی هەرێمی کوردستان لە دەرەوە هاوردە دەکرێن، بەشێکی کاڵاکانی ناوخۆش وەک ماددەی سەرەتایی لە دەرەوە هاوردە دەکرێت، دراوی بازرگانی و کڕینی کاڵاکانیش دۆلارە، بۆیە بەرز بوونەوەی بەهای دۆلار نرخی کاڵاکان بەرز دەکاتەوە.

 

-سەرەوەر کەمال ئاماژەی بۆ ئەوە کرد، بەرزبوونەوەی بەهای دۆلار، کاریگەری لەسەر بەرزبوونەوەی نرخی کاڵاکان لە ماوەی مانگێک بۆ سێ مانگ بەشێوەیەکی زۆر کەم دەبێت و لە ماوەی چوار مانگ بۆ 10 مانگ کاریگەری بەدیار دەکەوێت، ئەگەر بەهای دۆلاریش لە نرخی ئێستا جێگیر بێت، پێویستە بەکاربەر شێوازی کڕینی بگۆڕێت و حکومەتیش جۆرێک لە پاڵپشتی بۆ بازرگانان دروست بکات، تا ڕێگە لە کاریگەری بەرزبوونەوەی نرخەکان لەسەر خەڵک بگیرێت.

 

- ئەو کاڵایانەی ئێستا لە بازاڕ و کۆگاکان هەن، بەم نرخە بەرزەی دۆلار نەکڕاون، بۆیە لیژنەکانی چاودێریی بازاڕ بەردەوام چاودێری بازاڕ و کۆگاکان دەکەن و ڕێگری لە قۆرخکاری دەکەن، هەر کەسێک لە بەرزکردنەوەی نرخی کاڵا و هێشتنەوەی کاڵا لە کۆگاکان تا بەرزبوونەوەی نرخیان قۆرخکاری بکات، ڕێكاری یاسایی لە بەرامبەر دەگیرێتەبەر.

 

- سەروەر کەمال هاواری ئەوەشی گوت: هاونیشتمانیان لە هەر شوێنێک قۆرخکاریان بینی ڕاستەوخۆ پەیوەندی بە لیژنەکانی چاودێری بازاڕ بکەن و دەستبەجێ بەدواداچوون دەکەین.