ئەڵمانیا 1200 یۆرۆ دەداتە هەر هاووڵاتییەکی سووری بیەوێت بگەڕێتەوە

ئاڤا نیوز

 

حکومەتی ئەڵمانیا هاوکاری دارایی پێشکەش بە هەر هاووڵاتییەکی سووریا دەکات کە ئاوارەی ئەڵمانیان و  بیانەوێت بگەڕێنەوە سووریا.

 

وێنەگەورەکە: لە دوای ڕووخانی دەسەڵاتی بەشار ئەسەد لە سووریا، هاووڵاتیانی ئەو وڵاتە کە ئاوارەی وڵاتانی دیکەن دەگەڕێنەوە وڵاتەکەیان، ئەڵمانیا بۆ ئاسانکاریی و وەک هاندانێک بۆ گەڕانەوەیان هاوکاری داراییان پێشکەش دەکات.

 

لێدوانی فەرمی: وتەبێژی وەزارەتی دەرەوەی ئەڵمانیا ڕایگەیاند، ئەڵمانیا خەرجی گەشتکردن بە بەهای 200 یۆرۆ و تێچووی دەستپێکردنی کار بە بەهای هەزار یۆرۆ بۆ هەر ئاوارەیەکی هاووڵاتی سووریا دابین دەکات کە ئارەزووی جێهێشتنی ئەڵمانیا دەکات.

 

ئەمەش بزانە: بەپێی ڕاپۆرتێکی پەیمانگای ئابووری ئەڵمانیا  دەریدەخات، گەڕانەوەی پەنابەرانی سووری بۆ وڵاتەکەیان کاریگەری نەرێنی لەسەر ئابووری ئەڵمانیا دەبێت و کێشە بۆ ئەو کەرتانە دروست دەکات کە بەدەست کەمیی هێزی کارەوە دەناڵێنن، چونکە 80 هەزار هاووڵاتیی سووریا وەک ئەندازیاری ئۆتۆمبێل و پزیشکی ددان و لە چەندین کەرتی دیکە کاردەکەن.

 

لەلایەکی دیکەوە: دوێنێ هەینی، ئانالینا بایربۆک، وەزیری دەرەوەی ئەڵمانیا، بە یاوەری ژان نۆئێل بارۆت هاوتا فەرەنسییەکەی ، سەردانی دیمەشقیان کرد و جەختیان لە  هاوکاری پێویست بۆ پێکهێنانی حکومەتی نوێی  سووریا  کردەوە کە نوێنەرایەتی سەرجەم پێکهاتەکانی سووریا بکات.