هاوپەیمانی عەزم دەرچوونی کاندیدەکەی پارتی لە دیالە ڕاگەیاند

ئاڤا نیوز

هاوپەیمانی عەزم، ناوی ئەو 17 کاندیدەی بڵاوکردووەتەوە، کە لە بازنەکانی عێراق کورسی پەرلەمانیان مسۆگەرکردووە و ناوی کاندیدەکەی پارتی تێدایە کە لە دیالە کورسی بردووەتەوە.

چیرۆکی سەرەکی: پارتی دیموکراتی کوردستان، یەک کاندیدی لە بازنەی دیالە هەبوو، ئەویش نازک ئەحمەد محەممەد بوو، کە لە چوارچێوەی هاوپەیمانی عەزمی موسەننا سامەڕایی کاندید، توانی دووەم کورسی هاوپەیمانێتییەکە لەسەر ئاستی پارێزگاکە مسۆگەر بکات.

زانیاریی بەدەستهاتوو: هاوپەیمانی عەزم لە بازنەی دیالە دوو کورسی بەدەستهێناوە، کورسی یەکەم بۆ ڕەعد دەهلکی ڕۆیشتووە، کورسی دووەم بە گوێرەی سیستمی سانتلیگۆ بەر ئافرەتێک دەکەوێت، کە بووەتە بەشی نازک ئەحمەد، کاندیدی پارتی لەنێو هاوپەیمانێتییەکە.

ئەمەش بزانە: نازک ئەحمەد، توانیویەتی حەوت هەزار و 921 دەنگی بەدەستبهێنیت، کە چوارەم دەنگی لیستەکەی و زۆرترین دەنگ لەسەر ئاستی ئافرەتی هاوپەیمانێتیەکە دەکات.

لەلایەکی دیکەوە: کورد لە دیالە خاوەنی یەک کورسییە، پێشووتر ئەو کورسییە بۆ یەكێتیی نیشتمانی کوردستان بوو، بەڵام لەم هەڵبژاردنە هیچ کورسییەکیان لەو پارێزگایە بەدەستنەهێناوە، بەگوێرەی بڵاوکراوەی مەڵبەندی خانەقینی حیزبەکە سەرەڕای بەدەستهێنانی سەرووی 29 هەزار دەنگ، نەیانتوانیوە کورسی لە بازنەی دیالە مسۆگەر بکەن.