سوودانی: نابێت هیچ لایەنێک سەرچاوەکانی دەوڵەت لە کێبڕکێی هەڵبژاردنەکاندا بەکاربهێنێت

ئاڤا نیوز

سەرۆکوەزیرانی عێراق جەخت لە گرنگی ڕێگری کردن لە بەرکارهێنانی سەرچاوەکانی دەوڵەت لە کێبڕکێی هەڵبژاردنەکاندا لەلایەن لایەنە سیاسییەکان دەکاتەوە.

چیرۆکی سەرەکی: شەممە 24-5-2025، لە بەغدا محەممەد شیاع سوودانی، سەرۆکوەزیرانی عێراق پێشوازی لە محەممەد عەلی ئەللامی، سەرۆکی دەستەی دەستپاکیی عێراق کرد.

وێنە گەورەکە: بڕیارە لە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لایەنە سیاسییەکانیش دەستیان بە ئامادەکارییەکان کردووە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیران لەمیانی کۆبوونەوەکەدا، سەرۆکوەزیران بە پێویستی زانی هەوڵەکان چڕتر بکرێنەوە و ڕێگە بە هیچ لایەنێکی سیاسی نەدرێت سەرچاوەکانی دەوڵەت لە کێبڕکێی هەڵبژاردنەکاندا بەکاربهێنێت.

- بەهێزکردنی هەماهەنگی لەنێوان دەستەی دەستپاکی و دیوانی چاودێری دارایی و کۆمیسیۆنی هەڵبژاردنەکاندا بە پێویست زانرا، بۆ دەستەبەرکردنی شەفافیەت و بەرکەوتەی هەڵبژاردن.

لەلایەکی دیکەوە: سەرۆکی دەستەکە ئاماژەی بە توێژینەوەیەکی فراوان لەلایەن دەستەکەیانەوە کرد، هاوکات پێکهێنانی تیمی تایبەتمەند، بە ئامانجی ڕێگریکردن لە بەکارهێنانی سەرچاوەکانی دەوڵەت لە کێبڕکێی هەڵبژاردن و گەرەنتیکردنی ڕکابەرییەکی دادپەروەرانە لەنێوان سەرجەم کاندیدەکان.