عێراق و ئەمریکا تاوتوێی پەیوەندییە دوو قۆڵییەکانیان نێوانیان دەکەن

ئاڤا نیوز

سەرۆکوەزیرانی عێراق لەگەڵ هەڵسوڕێنەری باڵیۆزخانەی ئەمریکا جەخت لەسەر پێویستیی هاریکاری نێوان عێراق و ویلایەتە یەکگرتووەکان دەکاتەوە، هەردوولاش بە گرنگییەوە لە پەیوەندییە دوو قۆڵییەکان دەڕوانن.

وێنە گەورەکە: عێراق و ئەمریکا لە هەوڵی زیاتری پەرەپێدانی پەیوەندییەکانیان لەسەر ئاستە جیاوازەکان بەردەوامن، بۆ ئەو مەبەستەش چەندین یاداشتی لێکتێگەیشتن لە بوارەکانی ئابووری، وەبەرهێنان، ئاسایش، وزە و هاوکات ڕێککەوتنی ستراتیژیی لەنێوانیادا واژۆ کراوە.

چیرۆکی سەرەکی: محەممەد شیاع سوودانی، سەرۆکوەزیرانی عێراق پێشوازی لە ستیڤن ڤاگن، هەڵسوڕێنەری باڵیۆزخانەی ئەمریکا لە عێراق کرد بەبۆنەی وەرگرتنی ئەرکەکەی.

ڕاگەیێنراو فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، سوودانی هیوای سەرکەوتنی بۆ  ستیڤن ڤاگن لە ئەرکەکەیدا خواست، جەختی لەسەر پێویستیی هاریکاری نێوان عێراق و ویلایەتە یەکگرتووەکان کردەوە، بەپشتبەستن بە ڕێککەوتننامەی چوارچێوەی ستراتیژی و یاداشتەکانی لێکتێگەیشتن و هەماهەنگی و ڕاوێژ لەنێوان هەردوولادا، بەتایبەتی لە بوارەکانی ئابووری، وەبەرهێنان، ئاسایش، وزە، پەروەردە، وەبەرهێنان و چالاکییەکانی کەرتی تایبەت.

لە بەرامبەردا: ڤاگن، ئاماژەی بە گرنگی پەیوەندییە دووقۆڵییەکانی نێوان هەردوو وڵات کرد و پشتیوانی ویلایەتە یەکگرتووەکانی بۆ هاوبەشی لەگەڵ عێراق لەسەر ئاست و بوارە جیاجیاکان دووپات کردەوە، هاوکات جەختی لەسەر کارکردن بۆ هاتنەناوەوەی کۆمپانیا ئەمریکییەکان بۆ گۆڕەپانی وەبەرهێنان و هاوبەشی لە عێراق کردەوە.