ئاسایشی نیشتمانیی عێراق دەستبەسەر زیاتر لە 33 هەزار حەبی هۆشبەردا دەگرێت

ئاڤا نیوز

دەزگای ئاسایشی نیشتمانیی عێراق لە میانی دوو ئۆپەراسیۆنی جیاوازدا لە پارێزگای ئەنبار، دەست بەسەر زیاتر لە 33 هەزار حەبی هۆشبەردا دەگرێت و یەکێک لە "مەترسیدارترین بازرگانانی ماددە هۆشبەر"ـیش دەستگیر دەکات.

وێنە گەورەکە: زۆربوونی بەکارهێنان، بازرگانیکردن و بەرهەمهێنانی ماددە هۆشبەرەکان لە عێراق، بەشێوەیەک زیادی کردووە ڕێکخراوە خۆماڵی و نێودەوڵەتییەکان هۆشدارییان داوە لەوەی عێراق خەریکە ببێتە ناوەندێک بۆ بڵاوبوونەوەی ئەو ماددانە لە ناوچەکەدا.

ڕاگەیێنراوی فەرمی: بەگوێرەی ڕاگەیێنراوی دەزگاکە، هێزەکانی دەزگای ئاسایشی نیشتمانی دوو ئۆپەراسیۆنی ئەمنیی تایبەتیان لە پارێزگای ئەنبار ئەنجامدا کە بووە هۆی دەستبەسەرداگرتنی بڕێکی زۆر لە ماددە هۆشبەرەکان و دەستگیرکردنی ژمارەیەک تۆمەتبار.

شێوازی جێبەجێکردن: لە ئۆپەراسیۆنی یەکەمدا توانرا "یەکێک لە مەترسیدارترین" بازرگانانی ماددە هۆشبەرەکان کە داواکراو بوو، لە قەزای ڕومادی لە بۆسەیەکدا دەستگیر بکرێت و دەستیش بەسەر زیاتر لە سێ هەزار حەبی کەپتاگۆن و بڕێک ماددەی کریستاڵ دا گیرا.

لە ئۆپەراسیۆنی دووەمدا بە هاوکاری لەگەڵ وەزارەتی تەندروستی و سەندیکای دەرمانسازان کۆگایەکی دەرمان کرایە ئامانج و دەستبەسەر زیاتر لە 30 هەزار حەبی کارتێکەری عەقڵی قاچاخ و دوو هەزار 500 دەرزی تراماڵی ڕێگەپێنەدراودا گیرا.

ئەوەی پێویستە بیزانیت: تەنیا لە سێ مانگی یەکەمی ئەمساڵ، هەزار و 559 بازرگانی ماددە هۆشبەرەکان لە پارێزگاکانی عێراق جگە لە هەرێمی کوردستاندا دەستگیرکراون.