وڵاتانی یەكێتی ئەوروپا دیپۆرتی زۆرەملێی پەنابەرانی عێراقیان دەستپێكردووە

ئاڤا نیوز

دوای ئەوەی حكومەتی عێراق ڕێككەوتنێكی نهێنی لەگەڵ زۆرێك لە وڵاتانی یەكێتی ئەوروپا واژۆكرد بۆ دیپۆرتكردنەوەی زۆرەملێی پەنابەرانی عێراقی، ئێستا وڵاتانی ئەوروپا دەستیانكردووە بە جێبەجێكردنی ڕێككەوتنەكە و دەستیانكردووە بە دیپۆرتكردنەوەی پەنابەران.

 

زانیاریی بەدەستهاتوو: نووسراوێكی حكومەتی عێراق دەست ئاڤا میدیا كەوتووە كە لە مانگی تەمموزی ساڵی پار دەرچووە، تێیدا ئاماژە بە ناردنەوەی زۆرەملێی پەنابەرانی عێراقی (بە كورد و عەرەبەوە) كراوە، ئەوانەی كە تا ئێستا مافی مانەوەیان لە هیچ كام لە وڵاتانی ئەوروپا بەدەستنەهێناوە، لە بەرامبەردا وڵاتانی ئەوروپا هاوكاری ماددی پێشكەش بە حكومەتی عێراق دەكەن بۆ پشتیوانیكردنی ماددی و مەعنەوی ئەو هەڵمەتە، لەڕێگەی لەئەستۆگرتنی خەرجی گەڕاندنەوەی ئەو پەنابەرانە و شیاندنەوەیان بۆ نێو كۆمەڵگە دوای گەڕاندنەوەیان.

 

زانیاریی زیاتر: لە بەشێكی دیكەی نووسراوەكەدا هاتووە، ئەگەر عێراق پابەندی رێككەوتنی ناردنەوەی پەنابەران نەبێت، ئەوا پەرلەمانی یەكێتی ئەوروپا دەتوانێت كۆمەڵێك سزای سیاسی و ئابووری بەسەر عێراقدا بسەپێنێت.

 

لێدوانی فەرمی: ڕەنج پشدەری، چالاكوانی بواری مافەكانی پەنابەران لە ئەوروپا بە ئاڤای ڕاگەیاند، پاڵپشت بەو ڕێككەوتنە فەرمییە، ئێستا وڵاتانی یەكێتی ئەوروپا كۆكن لەسەر قورسكردنی مەرجی وەرگرتنی كەیسی پەنابەرانی عێراقی  و دیپۆرتكردنەوەی هەموو ئەو پەنابەرانەش كە هێشتا وەڵامیان وەرنەگرتووەتەوە.