قۆناغی دووەمی پرۆژەی کۆڕنیشی زاخۆ بەرەو تەواوبوونە

ئاڤا نیوز

تا دێت شارۆچكەی زاخۆ سیما گەشتیارییەكەی چەسپاوتر دەبێت، لە درێژەی گەشەپێدانی پرۆژە گەشتیارییەكانی دەڤەرەكەش، قۆناغی دووەمی پرۆژەی كۆڕنیش بەرەو تەواوبوون دەچێت.

چیرۆکی سەرەکی: پرۆژەی گەشتیاریی كۆڕنیشی زاخۆ، بە یەكێك لە پرۆژە گرنگ و ستراتیژییەكانی سێكتەری گەشتیاریی لە تێكڕای هەرێمی كوردستان دادەنرێت، دوای تەواوبوونی قۆناغی یەكەمی پرۆژەكە، ژمارەیەكی زۆری گەشتیاریی ناوخۆیی و بیانی بەرەو شارەكەی پردی دەلال ڕاكێشا، ئێستاش قۆناغی دووەمی پرۆژەكە بە گوژمەی شەش ملیار دینار تەواو دەكرێت.

وردەكاریی پرۆژەكە: درێژیی قۆناغی دووەمی کۆڕنیشی زاخۆ، سێ کیلۆمەترە و زیاتر لە 50% سەوزایی لەخۆ دەگرێت، پیادەی هاتووچۆ بە پانتایی هەشت مەتر بۆ هەر لایەک دروست کراوە، پرۆژەکە 85% کۆتایی هاتووە، کە خواردنگە، کافتریا و بەلەمی گەشتیاری لە پرۆژەکەدا هەن.

ڕاگەیێنراوی فەرمی: بەپێی بڵاوكراوەی ماڵپەڕی حكومەتی هەرێمی كوردستان، بە تەواوبوونی پرۆژەکە، ژمارەی گەشتیاران بۆ زاخۆ زیاتر دەبێت، بەو پێیەی كۆڕنیشی زاخۆ ئێستا بە یەکێک لە پرۆژە جوان و سەرنجڕاکێشەکانی کابینەی نۆیەمی حکومەتی هەرێمی کوردستان و ئیدارەی سەربەخۆی زاخۆ ئەژمار دەكرێت، کە بەردەوام هاووڵاتییانی ناوچە جیاوازەکانی کوردستان و گەشتیارانی عێراق و وڵاتانی دراوسێش ڕووی تێدەکەن.