فایلی خەڵک؛ سەدان کەس چاوه‌ڕوانی دامه‌زراندنن له‌ لیوا هاوبەشەکانی پێشمەرگە و سوپای عێراق

ئاڤا نیوز

نزیکەی 430 کەس لە مانگی حەوتی ساڵی ڕابردووەوە کە چاوپێکەوتنیان لەگەڵ کراوە بۆ دامەزراندنیان لە لیوای هاوبەشی سوپای عێراق و پێشمەرگە بێ وەڵام ماونەتەوە و داوایان لە ئاڤا کردووە بەدواداچوونیان بۆ بکات. 

چیرۆکی سەرەکی: ساڵی ڕابردوو ژمارەیەک هاووڵاتی هەرێمی کوردستان کە فۆڕمی داواکارییان پیشکەش کردبوو بۆ دامەزراندنیان لە لیوای 20ی هاوبەش بۆ ئەوەی بانگهێشت بکرێن بۆ ڕاهێنان، بەڵام تاوەکو ئێستا کەسیان وەڵامییان نەدراوەتەوە. 

لێدوانی فەرمی: لیوا عەبدولخالق تەلعەت، نوێنەری هەرێمی کوردستان لە فەرماندەیی هێزە هاوبەشەکانی عێراق لەوبارەیەوە بە ئاڤای ڕاگەیاند: ئەو کەسانەی کە چاوپێکەوتنیان لەگەڵ کردووە بۆ لە شوێندانان بووە، ئەو کەسانەی بۆ شوێنی ئەوانە بووە کە پێشتر ناویان بەهۆی کەموکوڕی مامەڵەکانیان لە ڕیزی لیوا هاوبەشەکان دەرهێنرابوو. 

ناوی ئەو 430 کەسەمان بۆ وەزارەتی بەرگری بەرز کردووەتەوە، ئەوانیش ناردوویانە بۆ وەزارەتی دارایی عێراق، بەڵام هێشتا لەوێ ڕەزامەندی بۆ نەگەڕاوەتەوە، چونکە دەبێت شایستەی داراییان بۆ دابین بکرێت ئینجا ڕاهێنانیان پێ بکرێت.
 
زانیاریی زیاتر: لەماوەی ڕابردوودا حکومەتی عێراق دوو لیوای هاوبەشی لە پێشمەرگە و سوپا پێکهێنا بۆ ئەو ناوچانەی بۆشایی ئەمنیان تێدایە لە سنووری ماددەی 140.