فایلی خەڵک؛ سەدان پێشمەرگەی خانەنشینکراو داوای خەرجکردنی ئیکرامییەکەیان دەکەن

ئاڤا نیوز

ئەو پێشمەرگانەی لە دوای شەڕی داعش خانەنشینکراون داوای خەرجکردنی ئیکرامییەکەیان دەکەن، بەڕێوەبەری گشتیی خانەنشینی پێشمەرگەش دەڵێت، "داوامان کردووە بە شێوەی قیست پارەمان پێ بدەن تا ئیکرامییەکەی پێ بدەین".

وێنە گەورەکە: نزیکەی 450 پێشمەرگە لە ساڵی 2018ـەوە خانەنشینکراون، وەک خۆیان دەڵێن ئەو کاتە ئیکرامییەی شەهیدان و کەمئەندامانی سەنگەر لەگەڵ بەشێکی خانەنشینانی پێشمەرگە دابەشکرا، "بەڵام بە ئێمەیان وت کە لەبەر دۆخی دارایی ئیکرامییەکەتان ڕاگیراوە، بەڵێننامەیان پێ پڕکردینەوە کە گوایە بەم نزیکانە دابەش دەکرێت، بەدواداچوونمان بۆ بکەن".

لێدوانی فەرمی: لیوای مافپەروەر حاجی مەلا ئەمین، بەڕێوەبەری گشتیی خانەنشینی پێشمەرگە لە وەزارەتی پێشمەرگە، بە ئاڤا میدیای ڕاگەیاند: داوامان لە ئەنجوومەنی وەزیران و وەزارەتی دارایی کردووە، بەشێوەی قیست مانگانە پێنج بۆ 10 ملیارمان پێ بدەن، بۆ ئەوەی بەسەر ئەو خانەنشینانە دابەشی بکەین.

- بڕی 53 ملیار دینارمان بۆ ئیکرامییەی ئەو پێشمەرگانە پێویستە، هەوڵدەدەین بۆ ئەمساڵ پارەکە وەربگرین و دەست بە دابەشکردنی بکەین، ئەگەرنا دەکەوێتە ساڵی ئایندە.

ئەوەی پێوستە بیزانیت: کۆی خانەنشینان لە هەرێمی کوردستان ژمارەیان نزیکەی 250 هەزار کەسە، نزیکەی 90 هەزاریان خانەنشینی پێشمەرگەن.