لە كابینەی نۆیەمدا، كارەبای 120 قوتابخانەی حكومی كراونەتە وزەی خۆر

ئاڤا نیوز

وەزارەتی پەروەردەی هەرێمی كوردستان ڕایدەگەیەنێت، لەماوەی پێنج ساڵی تەمەنی كابینەی نۆیەمی حكومەتی هەرێمی كوردستان، كارەبای 120 قوتابخانەی حكومی كراونەتە وزەی خۆر، پرۆسەكەش بەردەوامە.

چیرۆكی سەرەكی: وەزیری پەروەردەی حكومەتی هەرێمی كوردستان، لەمیانی بەشداریكردنی لە مەراسیمی دانانی وزەی خۆر بۆ ژمارەیەك قوتابخانەی حكومیی پارێزگای دهۆك، پرۆژەی دانانی سیستمی وزەی خۆری بۆ 25 قوتابخانەی قۆناغەكانی بنەڕەتی و ئامادەیی لە پارێزگاكانی هەولێر، دهۆك و هەڵەبجە ڕاگەیاند. هەریەك لە پارێزگاری دهۆك، سەرۆكی دەزگای خێرخوازیی بارزانی، بەڕێوەبەری گشتیی پەروەردەی دهۆك و ژمارەیەك بەرپرسی ئیداریی پارێزگاكەش ئامادە بوون.

زانیاریی بەدەستهاتوو: ئاڤا لە سەرچاوەیەكی نێو وەزارەتی پەروەردە زانیویەتی، لە ماوەی پێنج ساڵی تەمەنی كابینەی نۆیەمدا، كارەبای 120 قوتابخانە كراونەتە وزەی خۆر، بە تەواوبوونی پرۆژەكەش لەو 25 قوتابخانەی ڕاگەیێنرا، كۆی ژمارەكە دەبێتە 145 قوتابخانە.

ڕاگەیێنراوی فەرمی: بەپێی ڕاگەیێنراوی وەزارەتی پەروەردەی هەرێمی كوردستان، پرۆژەی دانانی وزەی خۆر بۆ 25 قوتابخانەی نوێ، لەلایەن دەزگای خێرخوازیی بارزانی پاڵپشتی دەکرێت و جێبەجێدەکرێت.