بەرپرسی لقی دووی پارتی: بەرەو پێكهێنانی كابینەی نوێین لە ئاییندەیەكی نزیكدا

ئاڤا نیوز

بەرپرسی لقی دووی پارتی دیموكراتی كوردستان ئاشكرای دەكات، بەرەو پێكهێنانی كابینەی نوێی حكومەتی هەرێمی كوردستانداین لە ئاییندەیەكی نزیكدا.

چیرۆکی سەرەکی: زانا مەلا خالید، بەرپرسی لقی دووی هەولێری پارتی دیموكراتی كوردستان، لە یادی 79ـەمین ساڵەی دامەزراندنی پارتیدا، میوانی ئاڤا میدیا بوو، وەڵامی ژمارەیەك پرسی پەیوەست بە حیزبەكەی و ئاییندەی پێكهێنانی كابینەی نوێی حكومەت و بەرژەوەندیی هاووڵاتیان دایەوە.

لێدوانی فەرمی: زانا مەلا خالید، بەرپرسی لقی دووی هەولێری پارتی دیموكراتی كوردستان ڕایگەیاند، بەرەو پێكهێنانی كابینەی نوێی حكومەتین لە ئاییندەیەكی نزیكدا، بەو پێیەی ئەو داواكاریی و گرفتە تەكنیكی و بەربەستانەی لە ماوەی ڕابردوودا لەبەردەم دانووستانەكان هەبوون، ئێستا بەرەو چارەسەربوون هەنگاوی ناوە و بۆچوونی شاندی باڵای دانووستانكاری پارتی و یەكێتی بەتەواوی لێك نزیكبووەتەوە.

زانیاریی زیاتر: لەبارەی هەڵبژاردنی داهاتووی پەرلەمانی عێراق، زانا مەلا خالید ئاماژەی بەوەكرد، پارتی خاوەنی زۆرترین كورسیی پەرلەمانییە لەنێو سەرجەم حیزب و هێزە سیاسییەكانی عێراقدا، بۆیە لەبەردەم ئەركێكی مێژووییە كە پارێزگاری لەو پێگە جەماوەرییەی بكات، دۆخی ئێستای عێراق و عەقڵیەتی ناتەندروستی حكومڕانیی عێراق، ڕەنگە لە ڕۆژانی داهاتوودا پێشهاتی نوێ دەهێنێتە كایەوە.