پەیامی سەرۆک بارزانی و باڵیۆزخانەی ئەمریکا لەبارەی مووچە

ئاڤا نیوز

 

سەرۆك بارزانی و هەڵسوڕێنەری كاروباری باڵیۆزخانەی ئەمەریكا كۆبوونەوە. لە دیدارەکەدا هەردوولا هاوڕابوون کە پێویستە چارەسەری پرسی کێشەی مووچە و شایستە داراییەکانی هەرێمی کوردستان بکرێت و مووچەی هاووڵاتییان نەبێتە بەشێک لە ناکۆکی و ململانێی سیاسی.

چیرۆکی سەرەکی: ڕۆژی چوارشەممە، 20ـی ئابی 2025، لە سەلاحەددین، سەرۆك مەسعود بارزانی پێشوازی لە باڵیۆز ستیڤن فەیگن، هەڵسوڕێنەری كاروباری باڵیۆزخانەی ئەمەریكا لە عێراق كرد. لە دیدارێكدا كە كونسووڵی گشتیی ئەمەریكا لە هەولێر، گویندەلن گرین ئامادەی بوو، دوا پێشهات و ڕووداوەكانی ناوچەكە و چەندین پرسی دیكەی جێی بایەخی هاوبەش تاوتوێ كران.

ئەوەی پێویستە بیزانیت: یەكێك لە تەوەرە سەرەكییەكانی كۆبوونەوەكە، تاوتوێ كردنی پەیوەندییەكانی نێوان هەولێر و بەغدا بوو. هەردوولا جەختیان لەسەر پێویستیی چارەسەركردنی كێشەی مووچە و شایستە داراییەكانی هەرێمی كوردستان كردەوە و هاوڕابوون كە نابێت مووچەی هاووڵاتییان بكرێتە بەشێك لە ململانێ سیاسییەكان.

 

هاوكات، پرسی هەناردەكردنەوەی نەوتی هەرێمی کوردستان و پاڵپشتی بۆ ئەو كۆمپانیا نەوتییە ئەمەریكییانەی كە بەپێی یاسا و دەستوور گرێبەستیان لەگەڵ حكومەتی هەرێمدا هەیە، دووپات كرایەوە.

لەلایەکی دیکە: لایەنێكی دیكەی گفتوگۆكان، پەیوەندییە دووقۆڵییەكانی نێوان هەرێمی كوردستان و ویلایەتە یەكگرتووەكانی ئەمەریكا بوو، كە تیایدا جەخت لەسەر بەهێزتر كردنیان  کرایەوە.

 

هاوکات: باس لە هەڵبژاردنی داهاتووی ئەنجوومەنی نوێنەرانی عێراق، بارودۆخی سوریا، پێشوەچوونی هەنگاوەكانی چاكسازی لە وەزارەتی پێشمەرگە و هەنگاوە ئەرێنییەكانی پەیوەست بە پێكهێنانی كابینەی نوێی حكومەتی هەرێمی كوردستان كرا.