ڕۆژنامەیەکی تورکی: هەسەدە ئامادەکاری وەڵامدانەوەی ئۆپەراسیۆن دەکات

ئاڤا نیوز

ڕۆژنامەی یەنی شەفەقی تورکی بڵاویکردووەتەوە، هەسەدە لە شاری ڕەقە لە سووریا، ئامادەکاری بۆ وەڵامدانەوەی ئەو ئۆپەراسیۆنە دەکات کە دەنگۆیەک هەیە بە هاوبەشی هێزەکانی سووریا و تورکیا لە دژی هەسەدە ڕێک دەخرێت.

زانیاریی بەدەستهاتوو: بەپێی ئەو زانیارییانەی کە یەنی شەفەق بڵاویکردووەتەوە، هەسەدە ژمارەی تونێلەکانی زیاتر کردووە و ڕۆژانە تونێلەکانی فراوانتر دەکاتەوە، ئەمەش دوای ئەوەی ڕەجەب تەیب ئەردۆغان، سەرۆککۆماری تورکیا و هاکان فیدان، وەزیری دەرەوەی تورکیا لە لێدوانێکیاندا بە زمانی هەڕەشەوە هۆشداری هێرشکردنە سەر هەسەدەیان داوە.

بەپێی هەمان سەرچاوە، هەسەدە لە شاری ڕەقە چینی ژێرەوەی پارک، یاریگاکان  و نەخۆشخانەکانی هەمووی کردووە بە تونێل، ئەم ماوەیە هەر خەریکی تونێل هەڵکەندن.

پەیامی فەرمی: ڕەجەب تەیب ئەردۆغان، سەرۆککۆماری تورکیا دوێنی پەیامێکی بۆ هەسەدە نارد و وتی: "ئەگەر شمشێرەکە لە کاڵانەکەی دەربهێنرێت، ئیتر پێویست بە قەڵەم ناکات".

لەلایەکی دیکەوە: ماوەیەک لەمەوبەر هاکان فیدان، وەزیری دەرەوەی تورکیا بۆ یەکەمجار زۆر بە تووندی هۆشداری دایە هەسەدە و وتی: ئاگامان لێیە خەریکی چین، تا زووە لەم ڕێگەیە بگەڕێنەوە، ئەگینا ئەنجامەکەی بە دڵی ئێوە نابێت.

گۆشەیەکی دیکەی دیمەنەکە: ماوەیەکە میدیاکانی تورکیا هەواڵی ئەوە بڵاودەکەنەوە، تورکیا و حکومەتی سووریا ئامادەکاری دەکەن بۆئەوەی ئۆپەراسیۆنێک لە دژی هەسەدە ڕێک بخەن، بەهۆی ئەوەی ئەوان "پابەندی ڕێککەوتنەکەی 10ی ئازار نەبوون کە دەبوو لەگەڵ هێزەکانی وەزارەتی ناوخۆی سووریا تێکەڵ بکرێن".

ئەوەی پێویستە بیزانیت: لە ماوەی دوو مانگی ڕابردوودا هەڵکەندنەکان خێراتر بوون و تەنها لە ڕەقە 14 دەرگای چوونە ژوورەوەی تونێلی جیاواز دەستنیشانکراون، کارەکە بڵاوبووەتەوە بۆ پارکەکان و یاریگاکان و تەنانەت لە ژێر نەخۆشخانەیەکدا.

زانیاریی زیاتر: بەپێی سەرچاوە ناوخۆییەکان و ئەو وێنانەی لەلایەن خەڵکی ئەو ناوچەیە گیراوە، هەسەدە هەم خەریکی هەڵکەندنی هێڵی نوێیە و هەم پێگەکانی ئێستا بەهێز دەکات بە ئامێری بیناسازی دروستکراوی ئەمریکا. هەروەها دەوترێت ئەم ئۆتۆمبێلانە بۆ گەیاندنی بارەکان بۆ شوێنە ستراتیژییەکان بەکاردەهێنرێن.