هەڵوێستی یەکێتی لەسەر ڕووداوەکانی لالەزار

ئاڤا نیوز

 

سەبارەت بە ڕووداوەکانی لالەزار و دەستگیرکردنی لاهور شێخ جەنگی، وتەبێژی یەکێتیی نیشتمانیی کوردستان ڕایگەیاند، هەوڵێک بۆ تیرۆرکردنی سەرۆکی یەکێتیی نیشتمانی و تێکدانی ئاسایشی سلێمانی و ڕاپەڕین و گەرمیان هەبووە.

 

وێنە گەورەکە: ئەمڕۆ چوارشەممە دەزگای ئاسایشی هەرێمی کوردستان بڵاوی کردەوە، زنجیرەپلانێکى هاوبەش لەنێوان لاهوور شێخ جەنگى و ئەژى ئەمین بۆ تێکدانى سەقامگیریى سلێمانى هەبووە، بەپێی بەڵگەکانیان، هەریەک لە لاهوور شێخ جەنگی و ئەژی ئەمین پێکەوە پلانیان بۆ کوشتنی بافڵ تاڵەبانی داناوە.

 

لێدوانی فەرمی: کاروان گەزنەیی، وتەبێژی یەکێتیی نیشتمانیی کوردستان لە کۆنگرەیەکی ڕۆژنامەوانیدا ڕایگەیاند: بەگوێرەی بەڵگەنامەکان کە لە هێزە ئەمنییەکانەوە دەستمان کەوتووە، هەوڵێک بۆ تیرۆرکردنی سەرۆکی یەکێتی، تێکدانی ئاسایشی سلێمانی، ڕاپەڕێن و گەرمیان هەبووە، خۆشبەختانە هێزە ئەمنییەکانی حکومەتی هەرێمی کوردستان لە ڕێگەی یاساوە ڕووبەڕووی تاوانباران بوونەوە و ڕادەستی یاسایان کردن.

 

وتەبێژی یەکێتی گوتیشی، ڕێگری لە دەستێوەردانی حیزبی لەم پرۆسەیە دەکەین، داوا لە دەسەڵاتی دادوەری دەکەین یاسا سەروەر بێت و بکەرانی ئەم پیلانگێڕییە سزای یاسایی خۆیان وەربگرن.

 

لەلایەکی دیکە: سەبارەت بە دەستگیرکردنی شاسوار عەبدولواحید، سەرۆکی جوڵانەوەی نەوەی نوێ، وتەبێژەکەی یەکێتی گوتی: ''دۆسیەکەی جیاوازە، هەرچەندە چەندین جار تەشیری بە یەکێتی لە ئاستی باڵا کردووە، بەڵام ئێمە سکاڵامان لەسەر تۆمار نەکردووە، ئەوەی هەیە سکاڵای یەکێکە لە پەرلەمانتارەکانی پێشووی پەرلەمانی کوردستان، ئەمەش لە دادگایە و داواکارین یاسا سەروەر بێت''.

 

بە تەنیشت ئەم بابەتەوە: هاوکات لەبارەی پێكهێنای کابینەی نوێی حکومەتی هەرێمی کوردستان، کاروان گەزنەیی ڕایگەیاند: لەسەر کارنامەی حکومەتی هەرێمی کوردستان گەیشتووین بە ڕێککەوتن، بەڵام بۆ جێبەجێکردنی ئەم کارنامەیە گرنگە پۆستەکان بە جۆرێک دابەش بکرێن کە بتوانین کارنامەکە لە ناو وەزارەتەکان جێبەجێ بکرێت.

 

باکگراوند: بەرەبەیانیی ڕۆژی هەینی هێزێکی زۆری ئەمنیی یەکێتی بە چەکی قورسەوە هێرشیان کردە سەر هۆتێل لالەزار و شوێنی مانەوەی لاهوور شێخ جەنگی، سەرۆکی بەرەی گەل، دوای شەڕێکی سێ کاتژمێری ناوبراو و پۆڵاد شێخ جەنگی برای و ژمارەیەکی زۆر کەسی دیکە دەستگیر کران.