لە كابینەی نۆیەم 52 کێڵگەمین لە مین پاکكراونەتەوە و ڕادەستی خاوەنەکانیان كراونەتەوە

ئاڤا نیوز

دەزگای گشتیی كاروباری مین لە هەرێمی كوردستان ئاشكرای دەكات، لە ماوەی كابینەی نۆیەمی حكومەتی هەرێمی كوردستاندا، زیاتر لە 11 ملیۆن و 373 هەزار و 50 مەتر دووجا زەویی هەرێمی كوردستانیان لە مین و تەقەمەنی پاككردووەتەوە، بە واتای پاككردنەوەی تێكڕای 52 كێڵگەی مین كە ئێستا ڕادەستی خاوەنەكانیان كراونەتەوە.

 

وێنە گەورەكە: لە درێژەی هەوڵە بەردەوامەکان بۆ پاراستنی گیانی هاووڵاتیان و ئاوەدان کردنەوەی ناوچە زیانلێکەوتووەکان و پاراستنی سرووشت و ژینگەی كوردستان، حکومەتی هەرێمی كوردستان، لە کابینەی نۆیەم، کارێکی بەرچاوی بۆ پاککردنەوەی ئەو ناوچانەی بە مین و تەقەمەنییەکان چێنراون، ئەنجام داوە.

 

لێدوانی فەرمی: نیازی خالید ئەرگوشی، جێگری سەرۆكی دەزگای گشتیی كاروباری مین بە ئاڤای ڕاگەیاند، لە ڕووی لەناوبردنی مین و تەقەمەنییەوە، تیمەکانی دەزگای گشتیی کاروباری مین، لە ماوەی كابینەی نۆیەمدا سەرکەوتوو بوون لە لەناوبردنی زیاتر لە 20 هەزار و 856 مین و هەروەها زیاتر لە 125 هەزار و 627 پارچە تەقەمەنیی دیكەی پاشماوەی جەنگ، کە هەڕەشەیەکی مەترسیدار بوون لەسەر سەلامەتیی خەڵک.

 

زانیاریی زیاتر: لە ئێستادا، دەزگای گشتیی کاروباری مین هەڵمەتێکی چڕی هۆشیار کردنەوەی دەست پێ کردووە بۆ گەیاندنی پەیامەکانی مەترسیی مین و تەقەمەنی بە هاووڵاتییان. تیمەکانی هۆشیاریی ڕۆژانە لە گەرمیانەوە تاوەکوو زاخۆ، سەردانی ناوچە سنوورییەکان و ئەو ناوچانە دەکەن، کە لە نزیک کێڵگەمینەکانن، بۆ ئەوەی زانیاریی پێویست بە خەڵک بگەیەنن و ڕێنماییان بکەن، كە چۆن خۆیان بپارێزن.

 

ئەوەی پێویستە بیزانیت:  جێگری سەرۆكی دەزگای گشتیی كاروباری مین گوتیشی، بە مەبەستی پاراستنی گیان و سەلامەتییان، داوا لە سەرجەم هاووڵاتییانی هەرێمی کوردستان دەکەین، لە کاتی بینینی مین و تەقەمەنی، یان لە حاڵەتی هەبوونی هەر مەترسییەک، بەپەلە پەیوەندی بە ژمارە (182) بکەن. ئەم ژمارەیە هێڵی گەرمی تایبەت بە دەزگای گشتیی کاروباری مینە و دەتوانن بێبەرامبەر پەیوەندی پێوە بکەن و دەزگاکەی لێ ئاگادار بکەنەوە.