تیمی "هەژماری من" داوایەکی خێرا لە خانەنشینان و مووچەخۆرانی سلێمانی دەکات

ئاڤا نیوز

 

تیمی پڕۆژەی "هەژماری من" بانگەوازێکی خێرانی ئاراستەی ئەو فەرمانبەر و خانەنشینانە کردووە- بەتایبەتی لە سنووری پارێزگای سلێمانی- کە فۆڕمی خۆتۆمارکردنیان لە پڕۆژەکە وەرگرتووە و تا ئێستا نەیانگەڕاندووەتەوە کە بە زووترین کات و بەتایبەت لەکاتی وەرگرتنی مووچەی مانگی شەشدا، فۆڕمە پڕکراوەکان بگەڕێننەوە بۆ بانکەکان.

هۆکارە زانراوەکان: مانگی ڕابردوو، لە کاتی دابەشکردنی مووچەی مانگی پێنج، هەزاران فۆڕمی خۆتۆمارکردن لە پڕۆژەی "هەژماری من" بە فەرمانبەران و خانەنشینان درا لە بانکەکاندا. بەڵام بەپێی زانیارییەکانی تیمی هەژماری من، ژمارەیەکی بەرچاو لەو فۆڕمانە تا ئێستا نەگەڕێندراونەتەوە، کە ئەمەش کاریگەریی لەسەر خێراکردنی پرۆسەی تۆمارکردن هەیە.

ڕاگەیێنراوی فەرمی: تیمی "هەژماری من" داوا دەکەن، کاتێک مووچەخۆران لە هەفتەی داهاتوو سەردانی بانکەکان دەکەن بۆ وەرگرتنی مووچەی مانگی شەش، فۆڕمە پڕکراوەکانیان لەگەڵ خۆیان ببەن و بیدەنە کارمەندانی بانک.

 

لەلایەکی دیکە: پڕۆژەی "هەژماری من" پێشکەوتنێکی بەرچاوی بەخۆوە بینیووە. لە کۆی زیاتر لە یەک ملیۆن مووچەخۆر لە هەرێمی کوردستان، تا ئێستا ژمارەی تۆمارکراوان گەیشتووەتە زیاتر لە 850 هەزار مووچەخۆر.

کارتی بانکی بە زیاتر لە 500 هەزار مووچەخۆر دراوەتەوە، زیاتر لە 400 هەزاریشیان مووچەی مانگی شەش بە دیجیتاڵی وەردەگرن لەڕێگەی ئامێرەکانی ڕاکێشانی پارە. لەو ژمارەیەشیان 20 هەزاریان خانەنشینن.

زانیاریی زیاتر: بەپێی ئامارەکان، ڕێژەی تۆمارکردنی فەرمانبەران لە هەژماری من لە هەولێر و دهۆک گەیشتووەتە %99. لە سلێمانیش، ئەم ڕێژەیە گەیشتووەتە 80٪، بەڵام ئەم ئامارە تەنها بۆ مووچەخۆرانی مەدەنییە.