زانیاریی نوێ لەبارەی کۆبوونەوەکەی مەزڵوم عەبدی و شاندێکی ئەمریکا لە ئوردن بڵاو دەکرێتەوە

ئاڤا نیوز

 

میدیای ڕۆژئاوای کوردستان دەڵێت، لە کۆبوونەوەکەی نێوان مەزڵوم عەبدی و شاندێکی ئەمریکادا کە 25ی ئاب لە ئوردن بەڕێوەچوو، باس لە "تێکەڵبوونەوە و لامەرکەزی بۆ سووریا" و چۆنییەتی جێبەجێکردنی ئەم سیستمە کراوە، بڕیاریشە لە داهاتوودا کۆبوونەوەی دیکە لەنێوان دیمەشق و ئیدارەی ڕۆژئاوای کوردستان بەمەبەستی گەیشتنە ڕێککەوتن ئەنجام بدرێن.

 

وێنە گەورەکە: ڕۆژی دووشەممەی ڕابردوو شاندێکی ڕۆژئاوای کوردستان کە پێکهاتبوون لە مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) و ئیلهام ئەحمەد، هاوسەرۆکی پەیوەندییەکانی دەرەوەی ئیدارەی ڕۆژئاوای کوردستان، لە عەممانی پایتەختی ئوردن لەگەڵ شاندێکی ئەمریکا کۆ بوونەوە کە پێکهاتبوون لە جین شاهین، ئەندامی لیژنەی پەیوەندییەکانی دەرەوە لە ئەنجوومەنی پیران و تۆم باراک، نێردەی تایبەتی سەرۆکی ئەمریکا بۆ سووریا.

 

زانیاریی بەدەستهاتوو: میدیای ڕۆژئاوای کوردستان لە سەرچاوەیەکی ئیدارەی خۆسەرەوە بڵاوی کردەوە، لە کۆبوونەوەکەدا گفتوگۆکانی نێوان دیمەشق و ئیدارەی خۆسەری، ئاستەنگیی بەردەم گفتوگۆکان و چۆنییەتی چارەسەرکردنیان تاوتوێ کراون، هەروەها گفتوگۆش لەسەر "تێکەڵبوونەوەی دیموکراسی و سیستمی لامەرکەزی لە سووریا" و چۆنییەتی جێبەجێکردنی کراوە.

 

خاڵە ئەرێنییەکان: ئەمریکا و فەڕەنسا نێوەندگیرن بۆ سەرخستنی گفتوگۆکانی نێوان دیمەشق و ئیدارەی خۆسەری، بۆیەش واشنتن و پاریس هەوڵەکانیان بەردەوامە بۆ ڕێکخستنی کۆبوونەوەی دیکە لەنێوان دیمەشق و ئیدارەی خۆسەری بەبێ ئەوەی کاتەکەی دیاری بکرێت.

 

لەلایەکی دیکەوە: پێشتریش ماڵپەڕی لیژنەی پەیوەندییەکانی دەرەوە لە ئەنجوومەنی پیرانی ئەمریکا ئاماژەی بەوەدابوو، لە کۆبوونەوەیدا لەگەڵ مەزڵوم عەبدی، جین شاهین باسی لە پشتیوانیی هەسەدە و چۆنییەتی تێکەڵبوونەوەی بە هێزەکانی سووریا کردووە، هاوکات باسی لە پێشکەوتنی دۆخی ئەمنیی و کاری لەپێشینەی واشنتن لە سووریا کردووە.

 

جین شاهین لە کۆبوونەوەیدا لەگەڵ ئەحمەد شەرع، سەرۆکی سووریاش کە لە دیمەشق چاوی پێیکەوت، باسی لە گرنگی پشتیوانیی مافی هەموو پێکهاتەکانی سووریا و گەرەنتی بەشداریکردنیان لە حکومڕانی وڵاتەکەدا کردووە.