کۆڕەک تیلیکۆم: دانووستانەکانمان لەگەڵ عێراق بەردەوامە

ئاڤا نیوز

 

ئاڤا میدیا بەدواداچوون بۆ چارەسەرکردنی کێشەکانی کۆرەک تیلیکۆم لەگەڵ عێراق دەکات  و کۆڕەک تیلیکۆمیش دەڵیت، دانوستانەکانمان بەردەوامن.

 

زانیاریی تایبەت: بەپێی زانیارییەکانی ئاڤا میدیا، گفتوگۆکانی نێوان کۆڕەک تیلیکۆم و عێراق لە هەنگاوەکانی کۆتاییدایە، ئەگەر هیچ شتێکی لەناکاو نەیەتە پێشەوە، ئەوا لە داهاتوویەکی نزیکدا پەیوەندییەکانی نێوان کۆڕەک تیلیکۆم و هێڵەکانی دیکە ئاسایی دەبنەوە، بەمەش هاووڵاتیان دەتوانن پەیوەندی بە تۆرەکانی دیکەوە بکەن لە سەرانسەری عێراق و جیهان.

 

پەیامی فەرمی: دەستەی کارگێڕیی کۆڕەک تیلیکۆم بە ئاڤای ڕاگەیاند، ئێمە هێشتا لە دانوستانی بەردەوامداین لەگەڵ دەستەی ڕاگەیاندن و پەیوەندییەکانی عێراق، بەڵام تا ئێستا هیچ شتێکی فەرمیمان نییە. ئومێدەوارین بتوانین بە زووترین کات ئەم کێشەیە بۆ بەشداربووانمان چارەسەر بکەین.

 

لەلایەکی دیکەوە: ئەندامێکی دەستەی ڕاگەیاندن و پەیوەندییەکانی عێراق بە ئاڤای ڕاگەیاند: لیژنەیەکی تایبەتمەند لەسەر کێشەکانی نێوان دەستەکە و کۆڕەک تیلیکۆم خەریکی گفتوگۆیە، لیژنەکە ڕاپۆرتەکان ئاڵۆگۆڕ دەکەن و بە ئاراستەی چارەسەرکردنی کێشەکان کار دەکەن.

 

باکگراوند: بە بیانووی کەڵەکەبوون و نەدانەوەی قەرزەکان، لە کۆتاییەکانی ساڵی 2023، چەند سزایەک بەسەر کۆمپانیای کۆڕەک تیلیکۆمدا سەپێنرا، دیارترینیان ڕاگرتنی پەیوەندیی تەلەفۆنی نێوان کۆمپانیاکە و هێڵەکانی دیکە بوو، هەروەها پچڕانی خزمەتگوزاریی ئینتەرنێت کۆڕەک بوو لە تەواوی پارێزگاکانی عێراق.