سیستمی غاز بۆ ئۆتۆمبێل لە هەرێمی کوردستان؛ سوود و مەترسییەکان

ئاڤا نیوز

لە هەرێمی کوردستان، بەکارهێنانی سیستمی غاز بۆ ئۆتۆمبێل لە زیادبووندایە، ئەمەش بەهۆی هەرزانی نرخی غاز بە بەراورد بە بەنزین و کەمبوونی کێشەی تەکنیکی. بەڵام، وەک هەر تەکنەلۆژیایەکی دیکە، ئەم سیستمەش مەترسیی خۆی هەیە ئەگەر بە دروستی بەکارنەهێنرێت.

 

هۆکارە زانراوەکان: هۆکاری سەرەکی بۆ بەکارهێنانی سیستمی غاز لە ئۆتۆمبێلدا، هەرزانی نرخی غازە بە بەراورد بە بەنزین. ئەمەش وادەکات خاوەن ئۆتۆمبێلەکان پارەی کەمتر بدەن بە سووتەمەنی. جگە لەوەش، بە گشتی کێشە تەکنیکییەکان بۆ مەکینەی ئۆتۆمبێل کەمترن کاتێک سیستمی غاز بەکاردێت.

لێدوانی فەرمی: سەروەت حەمەد ئەمین، خاوەنی کۆمپانیایەکی تایبەت بە دانای سیستمی غاز، بە ئاڤای گوت، لە ساڵی 2020 کار لەسەر دروستکردنی سیستمی غاز بۆ ئۆتۆمبێلەکان دەکەن و هیچ ئۆتۆمبێلێک بەهۆی تەقینی سیستمەکەوە نەسووتاوە. بەڵکو ئەوەی ڕوودەدات بەهۆی دزەکردنی غازە لە سیستمەکە، ئەمەش دەگەڕێتەوە بۆ کەمتەرخەمی شۆفێرەکان.

جەختی لەوەش کردەوە شۆفێر دەبێت سێ بۆ شەش مانگ جارێک پشکنین بۆ سیستمی غازی ئۆتۆمبێلەکەی بکات، بۆ ئەوەی هەر کەموکوڕییەک هەبێت چارەسەر بکرێت. ئەم پشکنینە دەتوانێت ڕێگری بکات لە ڕووداوە نەخوازراوەکان و سووتانی ئۆتۆمبێل.

ئەوەی پێویستە بیزانیت: سەروەت حەمەد ئەمین ئاماژەی بەوەدا کە سێ جۆر سیستمی غاز لە هەرێمی کوردستان بەردەستە، بەڵام تەنیا سیستمی ئیتاڵی و تورکی باوەڕپێکراون. بەپێچەوانەوە سیستمی وڵاتێکی دیکە بە خراپ و باوەڕپێنەکراو دادەنرێت. هۆکارەکەشی ئەوەیە بە قاچاخ دەهێنرێت و کەسانی نەشارەزا بۆ ئۆتۆمبێلی دادەنێن، ئەمەش دەبێتە هۆی گڕگرتنی ئۆتۆمبێل.

ئەمەش بزانە: تا ئێستا سیستمی غاز بۆ زیاتر لە 50 هەزار ئۆتۆمبێل لە هەرێمی کوردستان دانراوە. ئەم ژمارەیە گەورەیە ئاماژەیە بۆ خواستی زۆری خەڵک لەسەر ئەم سیستمە، بەڵام هاوکات پێویستە هۆشیاری تەواو هەبێت لەبارەی چۆنیەتی بەکارهێنان و پاراستنی.