پارێزگای هەڵەبجە: داوامانکردووە لە نرخی کارەبای ڕووناکی تایبەتمەندی بە پارێزگاکەمان بدرێت

ئاڤا نیوز

پارێزگای هەڵەبجە، بە فەرمی داوا لە ئەنجوومەنی وەزیران دەكات كە تایبەتمەندیی پارێزگاكە لەبەرچاو بگیرێت و بۆ نرخی كارەبای 24 كاتژمێر بەراورد بە پارێزگاكانی دیكە جیاكاری بكرێت.

چیرۆكی سەرەكی: پارێزگای هەڵەبجە، بووە یەکەمین پارێزگا لەسەر ئاستی عێراق و هەرێمی کوردستان کە بە تەواوەتی لە پڕۆژەی ڕووناكی كە كارەبای 24 كاتژمێرییە سوودمەند دەبێت.

ڕاگەیێنراوی فەرمی: پارێزگای هەڵەبجە ڕایگەیاند: سوپاسی حکومەتی هەرێمی کوردستان دەكەین کە هەڵەبجە وەک یەکەمین پارێزگا بە تەواوەتی ڕووناک دەکاتەوە و لەبەر رەچاوکردنی تایبەتمەندی پارێزگاکەمان، ئەم تایبەتمەندییەی پێ دراوە و ئەمەش بە دەستکەوتێکی گرنگ دادەنرێت بۆ پارێزگاکە و هاووڵاتیانمان.

- ئاگاداری هاووڵاتیانمان دەکەینەوە کە وەکو پارێزگای هەڵەبجە لەسەر داواکارییتان نامەی فەرمیی پێشکەش بە ئەنجوومەنی وەزیران کراوە سەبارەت بە نرخی کارەبا بە لەبەرچاوگرتنی ئەوەی کە هەڵەبجە پارێزگایەکی نوێیە و ژمارەی دانیشتووانەکەی کەمە، داوامان کردووە کە جیاکارییەک بۆ پارێزگاکە بکرێت لە نرخی کارەبادا، هیوامان خواستووە کە حکومەتی هەرێمی کوردستان لە داهاتوودا لە دۆخێکی دارایی گونجاودا بە نرخی پاڵپشتیکراوی زیاتر گۆرانکاری لە نرخ بکات.

- داوا لە هاووڵاتییانی خۆشەویست دەکەین کە هۆشیارانە مامەڵە لەگەڵ بەکارهێنانی کارەبادا بکەن و بەپێی ڕێنماییەکان بجوڵێنەوە، بەکارهێنانی کارەبا بە شێوەیەکی پێویست و بەرپرسیارانە و دوورکەوتنەوە لە زیادەڕۆیی، دەبێتە هۆی ئەوەی کە نرخی پسولەکان گونجاو بێت و باری سەرشانی هاووڵاتییان قورس نەبێت و زامنی دابینکردنی کارەبای بەردەوامە بۆ هەمووان. 

- ئامانجی پرۆژەی رووناکی ئەوەیە کە هاوڵاتییان بتوانن لە کارەبای بەردەوام سوودێکی زیاتر وەربگرن و لە هەمانکاتدا نرخی کارەباکەیان لەوەی پێشووش کەمتر بۆ بگەڕێتەوە.