کازمی پەیامێکی ئەمریکا سەبارەت بە حیزبوڵڵا دەگەیێنێتە لوبنان

ئاڤا نیوز

بەپێی ڕۆژنامەیەکی عەرەبی، بە ئامانجی گەیاندنی پەیامێکی ئەمریکا سەبارەت بە چەکی حزبوڵڵا و سەقامگیریی لوبنان، سەرۆکوەزیرانی پێشووی عێراق، بە سەردانێک گەیشتووەتە بەیرووت.

چیرۆکی سەرەکی: مستەفا کازمی، سەرۆکوەزیرانی پێشووی عێراق، بە هەماهەنگی لەگەڵ محەممەد شیاع سوودانی، سەرۆکوەزیرانی عێراق، دوێنێ پێنجشەممە گەیشتووەتە لوبنان و بڕیارە کۆبوونەوەی فەرمی لەگەڵ نەواف سەلام، سەرۆکوەزیرانی لوبنان و نەبیە بری، سەرۆکی پەرلەمانی لوبنان پێش دانیشتنەکەی حکومەت لەسەر چەکداماڵینی حیزبوڵڵا کەبڕیارە ئەمڕۆ بەڕیوەبچێت، ئەنجام بدات.

ڕاگەیێنراوی فەرمی: لەڕاپۆرتێکدا ڕۆژنامەی عەینی ئیماراتی لەزاری سەرچاوەیەکی تایبەتەوە لە حکومەتی عێراق ڕایگەیاندووە: کازمی  لەسەردانەکەیدا پەیامێکی هەڕەشەئامێزی ئەمریکا دەگەیێنێتە دەسەڵاتدارانی لوبنان سەبارەت بە چەکداماڵینی حیزبوڵڵای لوبنان و لە ئەگەری بەردەوامبوونی چەک لە دەرەوەی چوارچێوەی دەوڵەت، ڕەنگە ناسەقامگیری دۆخی ناوخۆیی و ناوچەیی و ڕووبەڕووبونەوەی ئاڵنگاریی نێودەوڵەتیی لێبکەوێتەوە.

زانیاریی زیاتر: لە بەشێکی دیکەی ڕاپۆرتەکە هاتووە،  ئەم جووڵانەوەیە لەلایەن کازمی و سوودانییەوە لە کاتێکدایە، مەترسی  گواستنەوەی کاریگەریی ململانێی ناوچەیی بۆ سەر خاکی لوبنان و عێراق بەتایبەتی لە سایەی گرژبوونی پەیوەندییەکانی نێوان حیزبوڵڵا و هەندێک وڵاتی ڕۆژئاوایی و ناوچەیی زیادیکردووە.

ئەمەش بزانە: لەگەڵ نزیکبوونەوەی وادەی دیاریکراو بۆ پێشکەشکردنی پلانێکی جێبەجێکردن بۆ چەکداماڵینی حیزبوڵڵا، فشارەکانی ئەمریکا لەسەر حکومەتی لوبنان زیادی کردووە،  ئەمەش هەنگاوێکە کە گۆڕانێکی بەرچاو لە مامەڵەی واشنتن لەگەڵ ئەم دۆسیەیەدا نیشان دەدات.