وەزارەتی دەرەوەی فەرەنسا: دەستبەرداری کورد نابین

ئاڤا نیوز

وەزارەتی دەرەوەی فەرەنسا جارێکی دیکە پشتگیریی خۆی بۆ کوردانی سووریا دووپات کردەوە و ڕایگەیاند، پاریس پابەندە بە پشتگیریکردن لە سووریایەک کە هەموو پێکهاتەکان لەخۆ بگرێت.

وێنە گەورەکە: فەرەنسا وەک یەکێک لە هێزە کاریگەرەکانی هاوپەیمانیی نێودەوڵەتیی، لە چەندین پرسی جیاوازدا بەردەوام پشتیوانی کوردان بووە، لە شەڕی دژ بە داعشیش پاڵپشت و پشتیوانییەکی بەهێزی هێزی پێشمەرگە و هەرێمی کوردستان بوو بە پێشکەشکردنی چەک و پشتیوانی لۆجستی و ڕاهێنانی هێزەکانی پێشمەرگە.

لێدوانی فەرمی: پاسکال کۆنفەڤرۆ، وتەبێژی وەزارەتی دەرەوەی فەرەنسا ڕایگەیاند: "دەستبەرداری کورد نابین، چونکە دەزانین چ قەرزێکیان لەسەر شانمانە؛ ئەوان برای هاوسەنگەری ئێمەن و پاریس پشتگیریی لە سووریایەک دەکات کە مافی هەموو پێکهاتەکان و کەمینەکانی تێدا پارێزراو بێت".

زانیاریی زیاتر: فەرەنسا لەم پەیامەیدا جەخت لەوە دەکاتەوە کە نابێت ئەو قوربانییانەی کورد لە شەڕی تێرۆردا داویانە فەرامۆش بکرێت و پێویستە لە هەر ڕێککەوتنێکی سیاسیی داهاتوودا، پێگەی کورد وەک هاوبەشێکی ڕەسەن بپارێزرێت تاوەکو ڕێگریی لە سەرهەڵدانەوەی توندڕەویی لە ناوچەکەدا بگیریێت.

باکگراوند: هێزەکانی سووریای دیموکرات (هەسەدە) لە ساڵی 2014ـەوە وەک هاوبەشێکی سەرەکیی هاوپەیمانیی نێودەوڵەتیی بە سەرۆکایەتیی ئەمریکا، ڕۆڵێکی یەکلاکەرەوەیان لە تێکشکاندنی داعشدا هەبووە. فەڕەنسا ساڵانێکی زۆرە پاڵپشتییەکی بەهێزی سیاسیی و سەربازیی پێشکەش بە کوردانی ڕۆژئاوا دەکات و هەمیشە وەک یەکێک لە نزیکترین هاوپەیمانەکانیان لە ئەوروپا ناسراوە.