هاوسەرۆکی پەیەدە بۆ ئاڤا: هیچ سازشێک بۆ سووریا ناکەین

ئاڤا نیوز

 

هاوسەرۆکی پەیەدە دەڵێت، هیچ سازشێک بۆ حکومەتی دیمەشق ناکەین، ئەزموونی زۆرمان هەیە دەمانەوێت هەرێمی خۆمان بەڕێوەببەین. لەبارەی تۆم باراکیش دەڵێت، نایەوێت هەسەدە وەک هێزێکی ناوخۆی هاوبەشی سووریا سەیر بکات.

 

وێنە گەورەکە: تۆم باراک، نوێنەری تایبەتی ئەمریکا بۆ کاروباری سووریا، بۆ جاری سێیەم تەنها لەماوەی دوو هەفتەدا لەگەڵ مەزڵووم عەبدی فەرماندەی گشتیی هێزەکانی هەسەدە کۆبوەوە کە جارێکیان لە دیمەشق و دووجاریش لە هەولێر بوو و دەربارەی دۆخی ئێستا ڕۆژئاوای کوردستان و دوایین پێشهاتەکان گفتوگۆیان کرد، ئەم کۆبوونەوانە لەکاتێکدان تەنها 48 کاتژمێر ماوە بۆ تەواوبوونی ماوەی ڕاگەیاندنی ئاگربەست و کۆمەڵگەی نێودەوڵەتی و ئەمریکا لە هەوڵی هێورکردنەوەی دۆخەکەدان و دەیانەوێت جارێکی دیکەش شەڕ ڕوونەداتەوە.

 

لێدوانی فەرمی: غەریب حەسۆ، هاوسەرۆکی پەیەدە بە ئاڤای گوت، دوای سەردانەکەی سەرۆک مەسعوود بارزانی بۆ ڤاتیکان و ئیتاڵیا هەوڵەکان بۆ ڕاگرتنی شەڕ زیاتر بوون.

- زۆر خۆشحاڵین بە پشتیوانییەکانی هەرێمی کوردستان بۆ رۆژئاوا، پشتیوانییەکانی سەرۆک بارزانی بەرز دەنرخێنین.

 

- تۆم باراك، نایەوێت هەسەدە وەک هێزێکی ناوخۆی هاوبەشی سووریا سەیر بکات. لەبارەی کۆبووەکەی ئەمڕۆی نێوان تۆم باراک و مەزڵووم عەبدی هاوسەرۆکی پەیەدە دەڵێت، هەریەك لە ئەمریكا، فەرەنسا و بەریتانیا چاودێریی كۆبوونەوەكەی ئەمرۆی هەولێریان کردووە.

- ئەگەر ئەنجامی كۆبوونەوەكە لە بەرژەوەندیی كورد نەبێت، ڕەتی دەكەینەوە. دەبێت کورد وەک نەتەوە سەیر بکرێت نەک کەمینە،  هیچ سازشێک بۆ حکومەتی دیمەشق ناکەین، ئەزموونی زۆرمان هەیە و دەمانەوێت هەرێمی خۆمان بەڕێوەببەین.