نەتەوە یەکگرتووەکان داوای ئاگربەستی دەستبەجێ لە سووریا دەکات

ئاڤا نیوز

نەتەوە یەکگرتووەکان هۆشداریی لە تێکچوونی دۆخی ئەمنیی سووریا دەدات و داوا لە حکومەتی سووریا و هەسەدە دەکات بەبێ مەرج پابەندی ئاگربەست بن و ژیانی هاووڵاتییانی مەدەنیی بپارێزن.

لێدوانی فەرمی: محەممەد خالید، یاریدەدەری سکرتێری گشتیی نەتەوە یەکگرتووەکان لە دانیشتنێکی تایبەتی ئەنجوومەنی ئاسایشدا ڕایگەیاند: "پێکدادانی توند لە پارێزگای حەسەکە و دەوروبەری کۆبانی بەردەوامە؛ داوا دەکەین لایەنەکان بە نییەتێکی پاکەوە بگەڕێنەوە سەر مێزی گفتوگۆ و پابەندی ئاگربەستی دەستبەجێ بن".

زانیاریی زیاتر: ئەنجوومەنی ئاسایش بە ئامادەبوونی وڵاتانی ئەندام و نوێنەری حکومەتی سووریا، بە وردیی تاوتوێی پێشێلکارییەکانی ئەم دواییەی کرد.

٠ یاریدەدەری سکرتێری گشتیی نیگەرانیی قووڵی ئەنتۆنیۆ گۆتێرێسی گەیاندە ئامادەبووان و جەختی لەوە کردەوە کە دەبێت بەپەلە ژێرخانی مەدەنیی بپارێزرێت و ڕێڕەوی هاوکارییە مرۆییەکان بۆ ناوچە گەمارۆدراوەکان بکرێتەوە.

٠ نەتەوە یەکگرتووەکان داوا لە حکومەتی دیمەشق و هەسەدە دەکات کە وردەکارییەکانی لێکتێگەیشتنی 20ی مانگ بە "گیانی سازان" جێبەجێ بکەن، تاوەکو یەکخستنەوەیەکی ئاشتییانەی ناوچەکانی باکوور و ڕۆژهەڵاتی سووریا لە چوارچێوەی دەوڵەتێکی یەکگرتوودا مسۆگەر بێت و ڕێگریی لە ئاوارەبوونی زیاتری هاووڵاتییان بگیریێت.