نۆ ئۆتۆمبێل لەسەر ڕێگای سلێمانی - چەمچەماڵ پێکیان دادا

ئاڤا نیوز

 

سەرلەبەیانیی ئەمڕۆ ڕووداوێکی هاتووچۆ لەسەر ڕێگای سلێمانی - چەمچەماڵ ڕووی دا و نۆ ئۆتۆمبێل پێکیان دادا، بەڕێوەبەری هاتووچۆی چەمچەماڵیش هۆکارەکەی بۆ سەرپێچیی یاساکانی هاتووچۆ دەگەڕێنێتەوە.

 

لێدوانی فەرمی: عەمید عومەر، بەڕێوەبەری هاتووچۆی چەمچەماڵ بە ئاڤا میدیای ڕاگەیاند: کاتژمێر 09:00ی سەرلەبەیانیی لەسەر ڕێگای گشتیی سلێمانی - چەمچەماڵ ئۆتۆمبێلێک سەرپێچی هاتووچۆی کردووە و چووەتە ئەوبەری شەقامەکە، بەوهۆیەوە لەگەڵ دوو ئۆتۆمبێل دا پێکیاندا داوە، دواتر شەش ئۆتۆمبێلی دیکەش بەوهۆیەوە تووشی پێکدادان بوون.

 

بەڕێوەبەری هاتووچۆی چەمچەماڵ دەشڵێت: یەکێک لە ئۆتۆمبێلەکان پاسی قوتابیانی زانکۆیە، بەڵام هیچ قوتابییەک بریندار نەبووە.

 

زانیاریی زیاتر: دوو شۆفێر و سەرنشینێک بەهۆی پێکدادانی ئەو نۆ ئۆتۆمبێلەوە برینداربوون، بەڵام برینەکانیان سووکە و ڕەوانەی نەخۆشخانەی چەمچەماڵ کراون بۆ ئەوەی چارەسەری پێویستیان بۆ بکرێت.