ئەمریکا حەواڵەکارانی پارە لە ئێرانەوە بۆ لوبنان سزا دەدات

ئاڤا نیوز

ئەمریکا ئەو کەسانە سزا دەدات کە بۆ دابینکردنی پشتیوانیی دارایی بۆ حیزبوڵڵای لوبنان، لە ساڵی 2025 پارەیان لە ئێرانەوە بۆ لوبنان حەواڵە کردووە.

چیرۆکی سەرەکی: وەزارەتی گەنجینەی ئەمریکا لە بەیاننامەیەدا ڕایگەیاندووە: 3 کەس بە تۆمەتی گواستنەوەی دەیان ملیۆن دۆلار لە ڕێگەی نووسینگەکانی حەواڵەوە بۆ حیزبوڵڵای لوبنان، سزادراون. 

لێدوانی فەرمی: جۆن هێرلی، یاریدەدەری وەزیری گەنجینەی ئەمریکا بۆ کاروباری تیرۆر و هەواڵگری دارایی ڕایگەیاند: لوبنان دەرفەتی ئازادی و خۆشگوزەرانی و ئاسایشی هەیە، بەڵام ئەمە تەنیا لە حاڵەتێکدا دەتوانێت ڕووبدات کە حیزبوڵڵا بە تەواویی لە چەک داماڵرێن و بودجە و دەستڕۆیشتوویی ئێران ببڕدرێت.

زانیاریی زیاتر: ئەمریکا لەوبارەیەوە باسی لەوەکردووە، حیزبوڵڵا ئەم پارەیەی بۆ پشتیوانی لە ئەندامەکانی، دووبارە بونیادنانەوەی ژێرخانی و بەرگریکردن لە بەرامبەر هەوڵەکانی حکومەتی لوبنان بۆ سەپاندنی سەروەریی بەسەر تەواوی خاکی لوبناندا، بەکار بردووە.