هاوپەیمانی مالیکی شێوازی دیاریکردنی سەرۆکوەزیرانی داهاتوو بۆ ئاڤا ئاشکرا دەکات

ئاڤا نیوز

عەباس موسەوی، سەرکردە و ڕاوێژکاری دەوڵەتی یاسایی مالیکی، لە لێدوانێکی تایبەتدا بۆ ئاڤا میدیا، چۆنییەتی دیاریکردنی سەرۆکوەزیرانی داهاتوو ئاشکرا دەکات و دەڵێت: "ئەنجامی هەڵبژاردنەکان دڵخۆشی زۆربەی لایەنە سیاسییەکانی بەدوای خۆیدا هێناوە و پەیامێکی ئەرێنییە بۆ پێکهێنانی حکومەتی نوێ".

وێنە گەورەکە: ئێوارەی ڕۆژی چوارشەممە 12ـی تشرینی دووەم، کۆمیسیۆنی باڵای سەربەخۆی هەڵبژاردنەکانی عێراق ئەنجامی بەرایی 98%ی دەنگەکانی هەڵبژاردنەکانی ڕاگەیاند.

لێدوانی فەرمی: عەباس موسەوی، سەرکردە و ڕاوێژکاری دەوڵەتی یاسایی مالیکی، ڕاگەیاند:  تێگەیشتن و سەقامگیری نێوان بەغدا و کوردستان بە دڵنیاییەوە خاڵێکی ئەرێنییە، بەو پێیەی کوردستان پشتگیرێکی سەرەکییە لە پێکهێنانی حکومەتی عێراق و چارەسەرکردنی کێشەکان لە ڕێگەی حکومەتێکی یەکگرتووەوە."

زانیاریی زیاتر: لەبارەی چوارچێوەی هەماهەنگییەوە، موسەوی جەختی کردەوە، لەناو چوارچێوەکەدا ڕێککەوتن لەسەر بەردەوامیدان بەو ئەزموونەی پێشوو هەیە، محەممەد شیاع سوودانیش، بەشێکی چالاکە لەناو چوارچێوەی هەماهەنگیدا بە گەرمی پێشوازی لێدەکرێت."

ئەمەش بزانە: سەبارەت بە پۆستی سەرۆکوەزیران، موسەوی ڕوونیکردەوە کە "هەمووان قایلن بەوەی پۆستی سەرۆکوەزیران لەناو چوارچێوەی هەماهەنگیدا دیاری دەکرێت و نەک لە ڕێگەی ژمارەی ئەو دەنگانەی کە هەر لایەنێک لەناو چوارچێوەکەدا بەدەستی هێناوە، چونکە چوارچێوەی هەماهەنگی کۆمەڵێک هاوپەیمانی و پارت و لایەنی لەخۆ گرتووە، هەر لەبارەی دیاریکردنی سەرۆکوەزیرانی داهاتووەوە، چوارچێوەکە ڕێسا و مەرجی تایبەتی هەیە بۆ هەڵبژاردنی سەرۆک وەزیران بەپێی لێهاتوویی و توانای بەڕێوەبردنی دەوڵەت."