د. هێمن هەورامی: پارتی لە سایەی سەرۆک بارزانی متمانەیەكی فراوانی بەدەستهێناوە

ئاڤا نیوز

د، هێمن هەورامی، ئەندامی مەکتەب سیاسی پارتی لە گفتوگۆی ڕۆژاندا ڕایگەیاند: پارتی لە سایەی سەرۆک بارزانی متمانەیەكی فراوانی بەدەستهێناوە و بەردەوامیش لە بەرەوپێشچوون دایە و پێگەی جەماوەری فراوانتر دەبێت. 

چیرۆکی سەرەکی: دوای ڕاگەیاندنی ئەنجامی بەرایی خولی شەشەمی پەرلەمانی عێراق لەلایەن کۆمیسیۆنی باڵای هەڵبژاردنەکانی عێراق، د. هێمن هەورامی، ئەندامی مەکتەب سیاسی پارتی میوانی گفتوگۆی ڕۆژان بوو و وەڵامی چەند پرسێکی گرنگ سەبارەت بە هەڵبژاردن و زیادبوونی دەنگدەکانی پارتی لەم هەڵبژاردنە دایەوە. 

لێدوانی فەرمی: لە وەڵامی پرسیاری ڕۆژان ئەبوبەکر، پێشکەشکاری ئاڤا میدیا لەبارەی نهێنی سەرکەوتن و باوەڕ بەخۆبوونی پارتی، د. هێمن هەورامی ڕایگەیاند: پارتی دیموکراتی کوردستان کار بە داتا دەکات و سوود لە ئەزموونەکانی ڕابردووی وەردەگرێت، پێش هەموو شتێکیش ڕابەرایەتیی سەرۆک بارزانی و پەیامەکانییەتی کە نوێنەرایەتیی هەموو پێکهاتە جیا جیاکان دەکات. 

د. هێمن هەورامی باسی لەوەشكرد: ئەوەی وایکردووە جەماوەری پارتی بمێنێتەوە بوونی متمانەیە، چونکە پارتی ئامرازێکە بۆ ستراتیژییەک کە کوردستانە، ئەوە نهێنی مانەوە و پتەوبوونی پارتییە، کە جیاوازە لە هێزەکانی دیکە کە ئەوان کوردستان وەکو ئامرازێک دەبینن. 

- هەموو لایەک ئەوە دەزانن کە ئاسایش و سەرقامگیری و ئاوەدانی لە سایەی پارتییەوە لە كوردستاندا هەیە، پارتی خۆی بە خاوەنی خاک و میللەتی خۆی دەزانێت و لە بەرپرسییارییەتی ڕاناکات، جیاواز لە هێزەکانی دیکە کە تووشی ئاستەنگییەک دەبنەوە لێی دەکشێنەوە و خۆیانی لێ بێبەری دەکەن. 

- بۆ زیادكردنی دەنگەكانمان بۆ هەڵبژاردنی داهاتوو لە ئەمڕۆوە دەستپێدەكەین، پلانمان بۆ ئەوە داناوە دەنگەکانی پارتی ئەمجارە بۆ سەروو یەک ملیۆن و نیو بەرز ببێتەوە.

- پارتی دیموکراتی کوردستان بە 400 هەزار دەنگی زیادكراو، وەڵامی هەموو گوشارەكانی دایەوە، لە مێژووی عێراقیش هیچ حیزبێك سەرووی یەك ملیۆن دەنگی لە عێراق نەبردووەتەوە.